ERMERA, 09 Outubru 2025 (TATOLI)–Sekretaria Estadu Kooperativa (SEKoop) halo lansamentu ba promosaun produtu kooperativa Bafo Kay Rala iha Eskola Bázika Filiál (EBF) Dona Ana Lemos iha munisípiu Ermera.
Sekretáriu Estadu Kooperativa, Arsénio Pereira esplika, objetivu SEKoop halo promosaun Bafo Kay Rala iha eskola sira tanba SEKoop iha nia planu prioridade sira, ne’ebé ida mak atu dezenvolve produtu ne’e hanesan produtu lokál husi kooperativa hodi kontribui ba programa Merenda Eskolár.
“Promosaun produtu Bafo Kay Rala ida-ne’e la’ós foin halo maibé halo ona iha eskola lubuk ida tanba produtu ne’e hola parte mós iha programa Merenda Eskolár. Ida-ne’e sai hanesan komuditi ida ne’ebé ita prodús iha rai-laran oinsá fó nutrisaun di’ak ba ita-nia estudante sira,” Sekretáriu Estadu hateten iha EBF Dona Ana Lemos, iha munisípiu Ermera, Kinta ne’e.
Notísia relevante : SEKoop halo promosaun ba produtu Bafo Kayrala iha EBC Laulara
Nia esplika, atividade lansamentu ne’e hanesan parte ida atu motiva kooperativa sira no komunidade agrikultór sira atu kontinua kuda iha futuru tanba programa Merenda Eskolár ne’e produtu 75% mai husi lokál.
Produtu Bafo Kay Rala ne’ebé ohin halo lansamentu promosaun ne’e mak hanesan biskuit, sasoro, no kaldu Bafo.
Atividade promosaun ne’e sei kontinua la’o tanba daudaun eskola barak mak husu atu halo promosaun mós ba sira-nia eskola.
SeKoop halo ona promosaun iha munisípiu hanesan Oekusi, Likisá, Aileu no Ermera.
Iha fatin hanesan, Koordenadora EBF Dona Ana Lemos Ermera, Bonabete Lopes lemos agradese tebes tanba SEKoop bele hili sira-nia eskola sai hanesan fatin ba lansamentu promosaun.
“Ami sente orgullu tebes tanba ohin loron ita bele mai hamutuk iha ne’e halo promosaun ba produtu Bafo Kay Rala ne’e, ami hein katak ba oin bele halo promosaun mós ba eskola sira hodi implementa iha Merenda Eskolár tanba produtu ne’e nakonu ho nutritivu,” nia katak.
Eskola Dona Ana Lemos rasik iha manorin hamutuk 31 ho totál estudante 974 no totál aula 24.
Jornalista : Arminda Fonseca
Editora : Julia Chatarina
