AILEU, 19 Setembru 2025 (TATOLI)-SekretariA Estadu Kooperativa, liuhusi Diresaun Nasionál Promosaun Produtu Kooperativa halo promosaun ba produtu Bafo Kayrala iha Eskola Bázika Sentrál 3º Siklu Laulara, munisípiu Aileu.
Sekretáriu Estadu Kooperativa, Aresénio Pereira, hateten promosaun ida-ne’e foin ba dahuluk halo iha eskola sira iha Aileu, nune’e futuru bele introdús hotu iha Programa Merenda Eskolár.
Nia esplika objetivu SEKoop halo promosaun Bafo Kayrala ba eskola sira ne’e, tanba iha IX Governu SEKoop iha nia planu prioridade sira no ida mak Bafo Kayrala atu dezenvolve komoditi ne’e sai hanesan produtu lokál husi kooperativa hodi kontribui ba merenda eskolár.
“Bafo Kayrala ida-ne’e halo ona teste iha laboratóriu hatudu iha nutrisaun di’ak ba labarik sira, nune’e halo promosaun atu eskola sira bele introdús iha merenda eskolár, fó han ba ita-nia estudante sira, tanba sira mak kontinuidade nasaun ne’e”, Arsénio Pereira hateten iha EBC 3º Siklu Laulara, ohin.
Nia esplika katak komoditi ida-ne’e bele introdús iha eskola sira, tanba foin lalais iha eventu Dili International Trade Expo (DITE) 2025, Primeiru-Ministru, Xanana Gusmão, mós orienta ona ba Ministériu Administrasaun Estatál (MAE) atu introdús iha merenda eskolár.
“Ohin, ita mai distribui ida-ne’e no prosesa ona sai hanesan dose, sasoro, paun no seluk tan. Sira koko para sente nia gostu hodi introdús iha merenda eskolár”, nia dehan.
Atu implementa iha merenda eskolár ida-ne’e, eskola sira mak halo kontratu fali ho kooperativa sira, liuliu Movimentu Kamponés Timor-Leste (MOKATIL), tanba SEKoop halo de’it promosaun.
Bainhira eskola sira introdús ona Bafo Kayrala maka parte SEKoop prontu fó formasaun ba koziñeira sira eskola nian atu hatene tein komoditi ne’e rasik.
Diretór Eskola Bázika Sentrál 3º Siklu Laulara, Aleixo Soares, kontente tebes tanba SEKoop bele deside sira-nia eskola sai fatin ba promosaun produtu Bafo Kayrala.
“Ami sente kontente ho produtu lokál Bafo Kayrala ne’ebé bele transforma hodi konsumu, tanba iha nutrisaun di’ak. Ho lansamentu ohin ne’e, iha futuru ami-nia eskola mós bele introdús iha merenda eskolár”, nia garante.
Iha fatin hanesan, estudante Aurora Sarmento hateten nia parte sente kontente konsumu Bafo Kayrala tanba iha sabór no nutritivu. “Ami han sente gostu tebes, tanba bele halo dose, paun no sasoro no ami hakarak ba oin han nafatin Bafo Kayrala”, dehan.
Eskola Bázika Sentrál 3º Siklu Laulara rasik ho totál estadudante hamutuk 473 no profesór 17.
Notísia relevante: EBC Salele sai pilotu ba utiliza Bafo Kay Rala iha PME
Jornalista: Arminda Fonseca
Editora: Maria Auxiliadora
