COVALIMA, 27 Maiu (TATOLI) – Sekretaria Estadu Kooperativa (SEKoop) hili Eskola Bázika Sentrál (EBC) Salele, iha Covalima, sai pilotu ba uza Bafo Kay Rala ka sorgu iha menú ba Programa Merenda Eskolár (PME).
Sekretáriu Estadu Kooperativa, Arsénio Perreira da Silva, hateten Governu liuhusi SEKoop fó prióridade atu prodús Bafo Kay Rala, nune’e bele sai ba menú ida iha implementasaun ba Programa Merenda Eskolár.
“Ha’u mai iha ne’e atu haree produsaun Bafo Kay Rala transforma ba bolu, xokolate, paun, sasoro no seluk tan hodi uza sai menú ba merenda eskolár”, governante ne’e dehan iha EBC Salele, Tilomar , ohin.
Arsénio da Silva salienta katak Bafo Kay Rala ne’e ai-han ne’ebé bele fó nutritisaun di’ak ba alunu sira, nune’e bele redús ai-han importadu hanesan sosis no ayam potong.
Reprezentante Prezidente Autoridade munisípiu (PAM) Covalima, Filomeno Cardoso, apresia ba Sekretáriu Estadu Kooperativa tanba hamosu programa hodi kuda Bafo Kay Rala ne’ebé hatudu ona nia rezultadu.
“Ita sente ona rezultadu husi Bafo Kay Rala tanba bele transforma ba foos hodi tein sasoro, etu, bolu no seluk tan. Husi ai-han ne’e ita nafatin promove no hasa’e ita-nia produsaun iha rai-laran”, nia realsa.
Diretór EBC Salele, Francisco da Silva, agradese ba Sekretáriu Estadu Kooperativa tanba hili eskola ne’e sai pilotu ba uza Bafo Kay Rala iha menú merenda eskolár. “Ho prezensa Sekretáriu Estadu atu apoia ami liuhusi produtu lokál ne’ebé prodús husi Tilomar-oan hanesan Bafo Kay Rala”, nia hateten.
Sekretáriu-Jerál Movimentu Kamponeze Timor-Leste (MOKATIL), Elias Agustinho, reforsa katak movimentu prontu atu fornese Bafo ba merenda eskolár, tanba stock sufisiente hela hodi responde ba programa ne’e.
“Ami submete ona karta ba Servisu Edukasaun Covalima atu distribui foos Bafo Kay Rala iha Programa Merenda Eskolár, tanba ami-nia stock sufisiente”, salienta.
Tuir dadus, iha 2024, MOKATIL iha membru 2000-resin ne’ebe kuda Bafo Kay Rala iha rai ektare 160. Daudaun ne’e, MOKATIL foin sosa membru na’in-ida nia Bafo kilógrama 885 ne’ebé kada kilo ho nia folin sentavu 0,37 no sira seluk sei tetu hela.
Notísia relevante: SECoop lansa produsaun promosaun Bafo-Kayrala iha Pante Makasar
Jornalista: Celestina Teles
Editora: Maria Auxiliadora
