OÉ-CUSSE, 23 fevereiru 2024 (TATOLI) – Sekretáriu Estadu Kooperativa (SECoop, sigla portuges), liuhusi Diresaun Nasionál Promosaun Produtu Kooperativa, tersa ne’e halo lansamentu produsaun hodi promove komoditi bafo-kayrala (sorgum) nu’udar produtu prima iha programa SECoop nian, iha sub-rejiaun Pante Rejiaun Administrativa Espesiál Oé-Cusse Ambeno (RAEOA).
Notísia relevante:SEKoop lansa programa kuda Bafo-Kayrala iha Pante Makasar
Sekretáriu Estadu Cooperativa, Arsénio Pereira, hateten, promosaun ida-ne’e la’os foin dahuluk, iha Oé-Cusse, maibé iha pasadu iha ona promosaun ba kooperativa sira, liuliu bafo-kayrala, tanba Oé-Cusse maioria dezenvolve ona komoditi bafo-kayrala kompara ho munisípiu seluk.
“Maibé ita-nia produtór sira, sei prodús uitoan no sei ki’ik, maibé ita espera katak, liuhusi promosaun ida-ne’e, ita bele atrai ema seluk, depois promove no prodús tán, nune’e sai hanesan produtu kooperativa no produtu ne’ebé bele fornese ba konsumu rai laran,” Arsénio Pereira hateten iha ámbitu serimónia lansamentu ne’e.
Governante ne’e fó sai katak, promosaun ba produsaun komoditi bafo-kayrala ne’e, bele produs ba hahán sasoro, halo etu fuga, doxe halo pudin no seluk-tán, nune’e nia husu Autoridade bele kontinua dezenvolve tán.
“Espera katak depoizde promosaun ida-ne’e, ha’u hanoin iha Autoridade RAEOA oinsa bele promove liután no bele sai mós hanesan matabisu rejiaun ninian ba eventu bo’ot sira-ne’eb’e Governu halo bele serbisu hamutuk ho kooperativa ne’ebé prodús bafo-kairala bele utiliza hahán sira-ne’e,” nia husu.
Iha fatin hanesan Koordenadór ZEEDOA, João Mende Gonçalves, reprezenta Prezidente Autoridade RAEOA, hato’o agradese ba prezensa SECoop iha Oé-Cusse,
“Ha’u sente katak inisiativa sira hanesan ne’e, di’ak tebes atu ita kontinua apoia nafatin, no apoia nafatin grupu kooperativa tanba ita-nia konstituisaun dehan katak, ita-nia ekonómia iha rai laran ne’e sei hamrik iha airin tolu,” nia katak.
Nia hatutan, dahuluk setór públiku mak Estadu nian, setór privadu mak emprezáriu no empreza sira, no datoluk mak setór kooperativu.
“Tan ne’e ita tenke dezenvolve kooperativa sira ho di’ak, Governu iha polítika ida-ne’ebé di’ak ba dezenvolvimentu kooperativa, SECoop mak implementa polítika ne’e, ami sei serbisu hamutuk sei fó apoia tomak atu hamutuk lori rai Oé-Cusse sai di’ak liu-tán,” nia konklui.
Notísia relevante:KRO aprova orsamentu SEKoop millaun $5,2 inklui adisionál
Entretantu, komoditi rezisténsia no adaptasaun ba impaktu mudansa klimatika klima muda ona, ai-han no komoditi agrikultura mós muda ona’, komoditi bao-kayrala fasíl halo tratamentu no sai hanesan hahán alternativa hodi komplementár baa batar no hare.
Jornalista: Abílio Elo Nini
Editor: Evaristo Soares Martins
