DILI, 30 outubru 2023 (TATOLI)–Komité Revizaun Orsamentu (KRO) aprova ona orsamentu ba Sekretaria Estadu Kooperativa (SEKoop) ho montante millaun $5,2 iha tinan 2024.
“Pakote fiskál ne’ebé ami simu millaun $3,8, ami husu adisionál aprova, entaun totál osan hamutuk millaun $5,2,” Sekretáriu Estadu Kooperativa, Arsénio Pereira da Silva, hateten, hafoin aprezenta orsamentu iha auditóriu Ministériu Finansa, Aitarak-laran, segunda ne’e.
Governante dehan, programa prioridade SEKoop iha tinan oin mak halo produsaun agríkola liu-liu produsaun Batar no Foos (Bafo)/Sorghum Kay Rala.
“Ba tinan oin nia, ami identifika ona rai ektare 700 iha territóriu nasionál, ne’ebé kuandu utiliza hotu rai ne’e signifika produsaun barak,” nia otimista.
Notísia relevante : SEKoop lansa programa kuda Bafo-Kayrala iha Pante Makasar
Iha biban ne’e, KRO rekomenda, molok atu halo produsaun ba produtu sira tenke halo uluk estudu sira hanesan aifuan has, uvas sabraka, abokate ka seluk tan. Aleinde ne’e, halo mós estudu ba modo no bani-been.
“Sira ne’e hotu sei sai produtu kooperativa, tanba iha futuru bainhira prodús tenke haree ba ninia prosesamentu, tenke iha fatin hodi rai, no halo promosaun ba produtu,” nia tenik.
Entretantu, SEKoop ezekuta ona orsamentu tinan 2023 nian hamutuk $1.392.967,09 (81,5%).
Jornalista : Antónia Gusmão
Editora : Julia Chatarina
