DILI, 21 Outubru 2025 (TATOLI)—Governu liuhusi Sekretáriu Estadu Komunikasaun Sosiál (SEKOMS), Expedito Loro Dias Ximenes, Tersa ne’e, lansa Website Rádiu Streaming Universidade Orientál Timor Lorosa’e (UNITAL), hodi prodús informasaun ne’ebé diferensa iha mídia konvensionál iha avansu teknolojia.
Expedito Ximenes hateten ezisténsia Rádiu Televizaun UNITAL importante tebes ba estudante sira hodi fó-sai hotu-hotu ne’ebé iha UNITAL.
“Ohin Sekretáriu Estadu Komunikasaun Sosiál reprezenta Governu lansa Website no Rádiu Streaming ba UNITAL hodi sira hahú hala’o sira-nia atividade diseminasaun informasaun. Konserteja ida-ne’e la’ós interese univeridade no estudante iha UNITAL maibé interese ba komunidade tomak,” Expedito Dias Ximenes dehan ba jornalista sira iha salaun UNITAL, Bekora.
Govenante ne’e hatutan frekuénsia rádiu ne’e bele kobre ba arredór universidade no mós ba área Bekora inklui área ne’ebé besik iha fatin ne’e.
“Tanba ne’e agradese tebes-tebes ba reitór, dosente no estudante tanba sira komprende importánsia informasaun hosi Rádiu Televizaun UNITAL ba estudante no komunidade,” SEKOMS dehan.
Iha biban ne’e, SEKOMS husu ba Reitór UNITAL atu rejistu iha Konsellu Imprensa (KI) tanba mídia komunikasaun sosiál hotu-hotu presiza rejista atubele hetan kredensiál. Ida-ne’e hanesan sertifikadu ne’ebé rekoñese hosi Estadu, ne’ebé sei reprezenta hosi Konsellu Imprensa.
Iha fatin hanesan, Reitór Interinu UNITAL, Cecílio Alves da Costa Belo hateten Rádiu Televizaun UNITAL ne’e importante no bele divulga informasaun ba estudante, komunidade no ba sosiedade sira hotu.
“Graça a Deus, ita UNITAL iha pasu ida tan parte mídia nian, ne’ebé haree buat ki’ik ida maibé ba ida-ne’e importante ba ami hodi fó informasaun ba sosiedade hotu-hotu,” Reitór UNITAL Interinu dehan.
Tanba ne’e, iha oportunidade ne’e husu ba SEKOMS atu nafatin akompaña RTVU nia prosesu hotu-hotu liga ba notísia ne’ebé fó-sai ba públiku.
“Bá-oin ami nafatin husu ba SEKOMS atu fó-atensaun no se tilun ba ami karik iha buat ruma ne’ebé presiza hadi’a atu RTVU ne’ebé bele prodús informasaun ne’ebé kualidade no kredivel. Tanba ne’e mak ami husu nafatin imi-nia kolaborasaun atu ami-nia ema ne’ebé servisu ba mídia ne’e bele servisu ho profesionál liután,” Atuál Vise Reitór II Asuntu Administrasaun no Finansa iha UNITAL tenik.
Jornalista: Osória Marques
Editór: Xisto Freitas da Piedade
