Autoridade Vikeke husu MKAE aumenta programa SFP ba joven atu aprende
VIKEKE, 10 Outubru 2025 (TATOLI)–Reprezentante Prezidente Autoridade Munisípiu Vikeke, Simões da Silva solisita Ministériu Koordenadór Asuntu Ekonómiku (MKAE) liuhusi Sekretaria Estadu Formasaun Profisionál no Empregu (SEFOPE) aumenta programa formasaun iha Sentru Formasaun Profisionál (SFP) Beasu atu kapasita joven Vikeke ba nesesidade kampu servisu.
“Inísiu estabelese sentru ida-ne’e ba área espesialidade hanesan kontrusaun sivíl ne’ebé kompostu husi karpintáriu, pedreiru, kanalizasaun bee-moos no eletrisidade. Tanba ne’e, ha’u hakarak rekomenda ba Governu liuhusi MKAE atu aumenta programa formasaun atu ita-nia joven sira asesu hodi aprende no prepara sira-nia aan ba kampu traballu,” Simões da Silva dehan ba TATOLI iha Vikeke, Sesta ne’e.
Simões aprofunda formasaun sira-ne’ebé presiza aumenta iha SFP Beasu mak hanesan manutesaun ba Air Condisioner (AC), ospitalária no formasaun otelária. Programa tolu ne’e importante tebes ba joven sira.
“Governu sentrál presiza promove formasaun iha área sira seluk. Labele iha área lima de’it. Tuir dadus ne’ebé ami rekolla katak iha Munisípiu Vikeke manuensaun ba área AC ne’e ema na’in-ida (1) de’it, entaun presiza aumenta programa ida-ne’e. Loke mós área kulinária lokál, otelária, alfaiate no restorante nian ba joven sira bele aprende,” nia esplika.
Nia argumenta formasaun sira-ne’ebé autoridade rekomenda Governu tenke tau importánsia hodi implementa, nune’e bele eleva joven sira-nia koñesimentu hodi kompete ba merkadu servisu no bele loke rasik kampu servisu.
Hatán ba asuntu ne’e, Reprezentante Ministru Koodernadór Asuntu Ekonomia, Jorgé Rui de Carvalho Martins hatete kona-ba rekomendasaun sira-ne’ebé maihusi autoridade Vikeke, MKAE sei tau-atensaun hodi enkaixa iha programa formasaun referida.
“Kona-ba área formasaun sira-ne’ebé parte autoridade Vikeke propoin ba ami sei tau ba traballu kaza. Ha’u espera tinan oin ita bele aumenta área sira-ne’e ba joven iha Munisípiu Vikeke,” nia hato’o.
Entretantu, SFP Beasu hahú harii iha tinan 2015 husi siklu ida (1) to’o siklu neen (6) ho área formasaun hamutuk lima no konsege forma ona joven hamutuk na’in-200-resin. Agora daudaun tama ona ba siklu hitu (7). Iha 2025, estudante na’in-32 no formadór hamutuk na’in-sanulu (10) iha sentru referidu.
Jornalista: Vitorino Lopez da Costa
Editór: Xisto Freitas da Piedade
