Top

Delegasaun Asian Athletic observa infraestrutura atletizmu iha Timor-Leste

Delegasaun Asian Athletic hasoru malu ho Prezidente Repúblika, José Ramos-Horta, iha Palásiu Prezidensiál Nicolau Lobato, Bairru Pite, sesta (10 Outubru 2025). Imajen.Mídia PR.

DILI, 10 Outubru 2025 (TATOLI) – Delegasaun husi Asian Athletic hala’o vizita durante loron tolu iha Timor-Leste hodi observa infraestrutura báziku kona-ba modalidade atletizmu nian.

Bainhira estadia iha Timor-Leste, sesta ne’e, delegasaun ne’e hasoru malu ho Prezidente Repúblika José Ramos-Horta hodi diskute kona-ba infrastrutura atletizmu no eventu Dili Internasionál Maratona ne’ebé sei realiza iha sáabdu (11 Outubru 2025) aban.

“Delegasaun husi Asian Athletic sira mai iha ne’e loron tolu (3) husi loron 08-10 Outubru mak sira foin fila. Sira-nia vizita ne’e importante tebes, sira mai atu haree infraestrutura báziku ba atletizmu nian hanesan Pista sira iha Glenu, Dili, Manatutu, Baukau no Bobonaro, ida-ne’e mak lori sira mai hasoru malu ho ita-nia Prezidente atu ko’alia kona-ba infraestrutura hirak ne’e,” Prezidente Federasaun Atletizmu Timor-Leste (FATL), Afrânio Xavier Amaral, hateten ba jornalista sira hafoin remata enkontru ho Xefe Estadu iha Palásiu Prezidensiál Nicolau Lobato, Bairru Pite.

Nia dehan, bainhira hasoru Xefe Estadu delegasaun ne’e relata katak Timor-Leste iha poténsia boot iha modalidade atletizmu no husu atu fó suporta nafatin modalidade referidu hodi hatudu prestasaun iha jogu nasionál no internasionál.

“Tuir sira-nia observasaun Timor-Leste iha poténsia boot no tempu ona atu aselera nia prestasaun, entaun sira husu ita atu hadi’a mak infraestrutura báziku sira hodi prepara atleta ne’ebé kualidade hodi kompete iha eventu nasionál no internasionál,” Afrânio dehan.

Delegasaun ne’e lidera husi Vise Prezidente Asian Athletic, Tigor Tanjung, konsege hasoru malu mós ho Ministru Juventude Desportu Arte no Kultura (MJDAK), Nelyo Isaac Sarmento, hodi ko’alia kona-ba infreestrutura báziku ba modalidade atletizmu.

Pontu Xave sira diskute ho MJDAK

Iha sorumuru ne’e, Vise Prezidente Asian Athletic, Tigor Tanjung, no Ministru Juventude, Desportu, Arte no Kultura (MJDAK), Nelyo Isaac Sarmento, diskute pontu prinsipál kona-ba dezenvolvimentu no investe iha modalidade desportivu sira mak hanesan;

  • Dezenvolvimentu Husi Baze: Presiza kolaborasaun entre MJDAK no Ministeriu Edukasaun hodi promove atletizmu hahú husi eskola sira.
  • Investimentu: Governu sei investe ba modalidade prioridade lima (5), inklui atletizmu.
  • Apoiu Dili Internasionál Maratona: Asian Athletics fó apoiu másimu ba Dili Internasionál Maratona ne’ebé sei realiza iha loron 11 fulan-Outubru.

“Ita hotu tenke servisu hamutuk hodi hasa’e kualidade atleta sira-nian ba nível internasionál,” Afrânio dehan.

Jornalista : Hortencio Sanchez

Wditór      : Cancio Ximenes

Publisidade

Leave a Reply

Latest Post

error: Content is protected !!