DILI, 10 Outobru 2025 (TATOLI)—Governu Timor-Leste liuhusi Sekretária Estadu Formasaun Profisionál no Empregu (SEFOPE) hamutuk ho Governu Austrália, kinta ne’e, inaugural edifísiu interinu foun Diresaun Nasionál Empregu Estranjeiru Pacific Austrália Labour Mobility (PALM) ne’ebé uluk iha Bekora hodi muda fali ba iha City 8.
Edifísiu ne’ebé konstrui husi kompañia internasionál RMS ne’e hodi fó Diresaun Nasionál Empregu Estranjeiru Sekretáriu Estadu Formasaun Profisionál no Empregu (SEFOPE) aluga interinamente durante tinan rua.
Sekretáriu Estadu Formasaun Profisionál no Empregu, Rogério de Araújo Mendonça, hateten SEFOPE servisu hamutuk ho Governu Austrália di’ak tebe-tebes, nune’e Austrália fasilita espasu di’ak atu harii sentru PALM ida iha Timor no prosesu sira-ne’e la’o hela, tanba ne’e sira husu Austrália nia tulun hodi muda Diresaun Naaionál Empregu Estranjeiru kontinua muda mai iha fatin ida-ne’e.
“Maibé, ha’u adianta nafatin katak fatin ida-ne’e la’ós SEFOPE mak finánsia maibé Governu Austrália mak finánsia. Ita aluga de’it hodi hein fatin ne’ebé Konsellu Ministru deside atu konstrui iha Tasi-Tolu no Governu Austrália mós halo ona levantamentu dadus,” Sekretáriu Estadu ne’e hateten ba jornalista sira iha City 8, Manleuana, kinta ne’e.
Governante ne’e afirma, bainhira Diresaun DNEE muda mai ona iha ne’e signifika timoroan sira ne’ebé atu aplika ba servisu iha Austrália, Nova Zelándia no Korea, sei rejistu iha edifísiu foun City 8, Manleuana.
“Ha’u mós atu esplika de’it katak fatin ne’e mós fahe espasu ba fatin tolu hanesan Korea, Nova Zelándia no Japaun, sira husu atu selu kada fulan hamutuk rihun $4. Kada espasu, husi nasaun ida rihun $1-resin, enkuantu espasu ba Austrália nian ho montante ne’ebe boot kada fulan sei selu rihun $45, tanba atendementu públiku sei konsentra hotu iha ne’e,” nia informa.
Enkarregadu Negósiu Embaixada Austrália iha Timor-Leste, Ed Wilkinson, hateten onra boot ida ba nia hodi reprezenta Embaixada Austrália halo inaugurasaun ofisiál ba ritóriu Labour Sending Unit foun-Diresaun Nasionál Empregu estranjeiru ne’ebé oras ne’e muda husi Becora ba nia edifísiu foun iha iha City (8).
“Lori Governu Austrália nia naran, ha’u hakarak hato’o agradesimentu ba Governu Timor-Leste, partikularmente liuhusi lideransa Sekretáriu Estadu Formasaun Profisionál no Empregu, eventu ohin ida-ne’e marka la’ós de’it ba LSU nian maibé ba parseria luan-liu entre ita-nia nasaun rua,” nia dehan.
Nia dehan, abertura ba instalasaun foun ida-ne’e reprezenta buat barak no reprezenta nasaun rua nia kompromisu hamutuk atu habelar dalan empregu nian ba povu Timor-Leste, atu garante katak dalan sira-ne’e hetan apoiu di’ak, sustentavel no muda ema-nia moris.
Tamba, eskema PALM hanesan programa emblemátiku ida-ne’ebé liga traballadór sira husi Timor-Leste ho oportunidade empregu iha setór agrikultura no setór kuida Austrália nian.
“Liuhusi ida-ne’e, traballadór timoroan rihun ba rihun bele hetan rendimentu, hetan abilidade no esperiénsia foun sira no lori benefísiu sira-ne’e fila ba uma ba sira-nia familia no komunidade,” nia esplika.
Tuir informasaun, Diresaun Nasionál Empregu Estranjeiru sei mobiliza sira-nia ekipamentu hahú agora no iha loron segunda (14 Outubru 2015), sira sei hala’o servisu hanesan baibain iha edifísiu foun ida-ne’e.
Jornalista : Alexandra da Costa
Editór : Cancio Ximenes
