DILI, 10 Outubru 2025 (TATOLI)—Vise-Prezidente Konfederasaun Sindikatu Timor-Leste (KSTL), Serafico Natalino Soares informa KSTL disemina Ezbosu Lei Violénsia Asédiu no promove konvensaun kona-ba violénsia bazeia jéneru ba traballadór hamutuk 27.
“Ohin ita disemina kona-ba violénsia no asédiu sexuál iha mundu traballu ba ita-nia traballadór sira hamutu 27, ne’ebé maihosi setór komérsiu, otelária, marítima, Kafé Timor, karpintária no hosi setór seluk tan,” nia dehan ba jornalista sira iha edifísiu FOKUPERS, Faról, Dili, Sesta ne’e.
Serafico hatutan ida-ne’e hanesan faze ida-ne’ebé atu hatudu ba Governu katak presiza duni atu ratifika konvensaun 190 ida-ne’e. Konvensaun ne’e importante tebes, Governu presiza aselera hodi aprova tanba to’o agora seidauk iha regra ida ba violénsia no asédiu sexuál.
“Ohin ita fó formasaun ida-ne’e tanba daudaun ne’e ita rejistu kazu asédiu sexuál hamutuk lima maibé tolu rezolvidu no rua mak sei pendente hela,” nia haktuir.
Iha fatin hanesan, Xefe Departementu Mediasaun no Konselasaun SEFOPE, Belarmino da Cruz hateten importánsia husi formasaun ne’e atu oinsá traballadór sira mós bele informadu kona-ba violénsia no asédiu sexuál.
“Ohin mai fahe formasaun ne’e ba traballadór sira atu hatene oinsá prevene violénsia no asédiu sexuál iha servisu fatin,” nia dehan.
Nia hatutan to’o agora ninia departamentu rasik mós seidauk rejistu kazu kona-ba asédiu sexuál iha traballadór sira-nia servisu fatin.
Jornalista: Osória Marques
Editór: Xisto Freitas da Piedade
