BOBONARU, 09 Outubru 2025 (TATOLI) – Hafoin Institutu Jestaun Ekipamentu Apoia Dezenvolvimentu Infaestrutura (IGEADI) Brigada Maria-Tapo, aterru rai halo tetuk, negosiante sira idaidak re-konstrui fali fatin negósiu iha merkadu Ilibole tuir dezeñu ne’ebé Autoridade Munisípiu Bobonaru prepara.
Dezeñu ne’e mai ho totál uma unidade 63, ne’ebé kada-uma ho medida 3×4 no dezeñu fahe ba parte estrada kraik ba negosiante sira halo kioske no estrada leten ba fa’an modo no ai-fuan nian.
Negosiante, Inacio Marques, konfirma katak fatin ne’e sira konstrui ho kbiit rasik. “Uma ne’e ami na’in sobu, na’in halo rasik. Agora ami na’in hola kalen, ai, besi, rai-henek no simentu mak hodi halo uma-oan ne’e,tanba fulan kotuk ne’e Estadu halo ami sobu tiha ami-nia kios, ne’e mak hodi osan fa’an durante ne’e, ami halo fali uma-oan para hodi bele buka osan,” nia informa ba Jornalista TATOLI, iha terrenu, kinta ne’e.
Inacio rekomenda ba Autoridade Munisípiu Bobonaru atu kontinua halo planu ida-ne’ebé di’ak hodi kria kondisaun ida dignu.
“Estadu Hakarak fatin ne’e di’ak,ema haree kapas, halo netik uma ba ami para ami hamutuk deit,se la’e ami ida-idak halo. Balun uza kalen, balun uza ai, balun uza besi, kalen balun haree la di’ak ona – ida-ne’e la di’ak, depois ida agora ami halo ne’e tuir de’it ami-nia forsa, la dura. Dalaruma udan ho anin mai bele sobu fali,” nia konsidera.
Alende ne’e Komunidade Bobonaru, Nelson Afonso Perreira, rekomenda ba governu liuhusi Ministériu relevente atu instala mós enerjía elétrika hodi fasilita negosiante sira halo atividade negósiu iha tempu kalan.
“Ita haree realidade sira balun hela iha ne’e, dalaruma tempu kalan ita liu ba mai iha ne’e, bolu atu hola sasan,sira sai mai ho de’it lampáda no lilin mak atende ita, tanba sira la asesu eletrisidade, ida-ne’e mak hanesan komunidade ami preukupa tanba fatin ida-ne’e sentru no iha kedas estrada-ibun. Se bele, Estadu tau-matan ba, tanba liña eletrisidade besik kedas sira,tanba saida mak sira labele hetan ahi? nia kestiona.
Vendedór sira ne’ebé daudaun iha merkadu Ilibole mai husi suku Raifun no Odomau, Postu Administrativu Maliana no suku Oe-leu, Postu Administrativu Bobonaru.
Notisia relevante: https://tatoli.tl/2025/09/05/amb-entrega-dezenu-merkadu-ilibole-ba-negosiante-sira/
Jornalista:Sergio da Cruz
Editór: Rafael Ximenes de A. Belo
