PNTL detein sidadaun na’in-10 iha Jita Plaza no Kolmera relasiona jogu online
DILI, 10 Outubru 2025 (TATOLI)—Polísia Nasionál Timor-Leste (PNTL) liuhusi Diresaun Nasionál Servisu Investigasaun Kriminál (DNSIK) iha Kinta (09/10) maizumenus tuku 23:00, Konsege detein sidadaun estranjeiru hamutuk na’in-10 iha Kolmera no Jita Plaza relasiona ho jogu no scam online.
“Husi operasaun ne’e ami deteta jogu online la’o hela no ita detein main actor ba jogu online hamutuk na’in-10, hanesan sidadaun Xina no Indonézia, ne’ebé prosesu identifikasaun la’o hela,” Diretór Nasionál Servisu Investigasaun Kriminál, Superintendente Polísia João Belo dos Reis hato’o ba Jornalista sira liuhusi konferénsia impresa ne’ebé hala’o iha Kuartél Jerál PNTL, Kaikoli, Sesta ne’e.
Notísia relevante : Governu aprova rezolusaun proposta kanselamentu lisensa ba operasaun jogu-aposta online
Nia dehan, operasaun ne’e hahú horisehik bainhira hetan informasaun husi komunidade katak maski Governu bandu ona jogu online sira, maibé iha fatin balun sei nafatin la’o.
Husi operasaun ne’e, ekipa konsege rekolla telefone Redmi, Realme no Xiaomi hamutuk 65, pasaporte haat tuir loloos 10 maibé neen seluk lorokraik mak foin rekolla no sim cart barak (seidauk konta) husi operadór Telkomcel no Telemor iha kaixa boot ida resin.
“Ita bele konsidera ida-ne’e hanesan call center/penipun online no jogu online, ne’ebé iha hela prosesu identifikasaun,” Superintendente Polísia João Belo akresenta.
Kazu ne’e rejista ona iha Ministériu Públiku NUC 0323/2025-PNSIK.
Diretór Nasionál Servisu Investigasaun Kriminál ne’e informa iha indikasaun ligasaun ho jogu no scam online iha Rejiaun Administrativa Espesiál Oékusi Ambeno (RAEOA), maibé parte responsável sei halo prosesu indentifikasaun nune’e hatene nia verasidade.
Jornalista : Natalino Costa
Editora : Julia Chatarina
