VIKEKE, 10 Outubru 2025 (TATOLI)—Diretór Servisu Ministériu Agrikultura Peska, Pekuária no Floresta (SMAPPF) Munisípiu Vikeke, Olívio Soares Freitas informa SMAPPF Vikeke daudaun ne’e hahú koloka tratór boot tolu ba suku tolu hodi apoiu agrikultór fila-rai.
“Daudaun ne’e ita destaka ona tratór boot iha suku tolu hanesan Uma-Ua’in Leten, Fatudere, depoiz ida-ne’e hotu kontinua tama iha Suku Maluru, Postu Vikeke Vila, bazeia ba komunidade nia pedidu ba MAPPF atu apoia fila-rai kuda hare rai-maran no batar,” Olívio Soares Freitas ba TATOLI iha Postu Vikeke, Sesta ne’e.
Olívio hatutan agrikultór husi Munisípiu Vikeke barak mak hato’o pedidu fila-rai ba SMAPPF Vikeke, maibé tratór boot barak mak aat, agora unidade tolu mak funsiona di’ak nune’e agora apoiu fila-rai iha suku tolu.
Tuir nia SMAPPF Vikeke sei fó apoiu tratór boot ba agrikultór sira husi suku seluk iha Munisípiu Vikeke, maibé hein manutensaun ba tratór unidade ualu ramata tanba tratór boot kondisaun aat.
“Ita iha tratór boot natoon ne’e foun lima, maibé tratór ne’e labele fila-rai maran, uza ba de’it natar ne’e di’ak. Entaun, ami aprezenta hotu problema sira-ne’e ba nasionál hodi halo manutensaun ba tratór unidade ualu ne’ebé dauduan ne’e avaria hela,” nia haktuir.
Nia relata atividade fila-rai ka toos ne’e ho medida 50×50, balun ektare ida, komunidade mak sosa kombustivel hodi enxe ba tratór.
Enkuantu, tuir dadus, agrikultór husi Suku Uma-Ua’in Leten ne’ebé hato’o pedidu fila-rai hamutuk uma-kain 42, Suku Fatudere uma-kain 25 no Suku Maluru uma-kain 18.
Jornalista: Vitorino Lopez da Costa
Editór: Xisto Freitas da Piedade
