DILI, 10 Outobru 2025 (TATOLI)—Traballadór timoroan ne’ebé ho naran estimada Akoli inklui ninia kolega traballadór na’in-rua, ohin dadeer, hetan asidente no mout bainhira sira halo hela servisu hanesan peskadór nian iha tasi Korea Súl, to’o agora parte seguransa marítima sira halo hela operasaun maibe seidauk hetan traballadór ne’e nia mate-isin.
Tuir traballador timoroan iha Korea, Marco da Silva, informa kronolojia loloos katak ohin dadeer bainhira sira ba serbisu iha tasi, traballadór ne’ebé hetan insidente ne’e mós ba hotu serbisu kona ba kim (material espesífiku peskadór) nian, maibé bainhira atu hasa’e kaixa kim nian ba ró leten tali fekit maka’as konsege baku sira na’in-rua hodi monu tuun ba tasi no dook tiha husi ró.
“Ró ne’e iha traballadór na’in-tolu mak servisu hamutuk timoroan na’in-rua no Korea nia na’in ida, maibé traballadór husi Korea ne’e monu iis laiha tiha no namlele hela iha bee leten, agora lori tiha ona ba ospital,” Sasin traballadór timoroan iha Korea ne’e esplika ba Agência Tatoli liuhusi telefónika, ohin.
Nia informa, traballadór timoroan seidauk hetan tanba nia mout tiha ba tasi okos no to’o agara parte polísia sei buka hela maibé seidauk hetan.
“Iha Korea, Ami iha illa ida de’it no hela besik malu maibé servisu mak iha kompañia ketak-ketak, ami mós pasa ona informasaun ba ita-nia adidu iha Korea,” nia dehan.
Iha biban ne’e Agênsia Tatoli mós halo oma konfirmasaun husi parte Sekretária Estadu Formasaun Profisionál no Empregu (SEFOPE), liuhusi Diretór Jerál Diresaun Nasionál Empregu Estranjeiru, João Correia, hateten sira rona ona informasaun kona-ba akontesementu ne’e husi traballadór oan sira iha Korea.
“Maibé ami seidauk hetan informasaun konkreta husi adidu Timor-Leste nian iha Korea, hein katak sira sei pasa informasaun mai hodi foti medida ruma,” nia hateten.
Nia hatutan, tuir informasaun katak daudaun ne’e parte seguransa husi Korea nian halo hela atuasaun hodi buka mate-isin maibé seidauk hetan, nune’e ita iha esperansa atu hetan lalais ita-nia traballadór ne’e.
Jornalista: Alexandra da Costa
Editór : Cancio Ximenes
