ATAÚRU, 11 Outubru 2025 (TATOLI)–Komunidade Ataúru, Sábadu ne’e, entrega rai ektare lima ba Governu hodi kontrui fatin ba solár panél nune’e fornese eletrisidade ba komunidade tomak iha Ataúru.
Serimónia entrega rai ektare lima ne’e komunidade entega ba Governu ne’e liuhusi Ministru Obra Públika, Samuel Marçal ne’ebé asina termu aseitasaun ho rai-na’in ne’ebé asiste direta husi Primeiru-Ministru, Xanana Gusmão no Prezidente Autoridade Munisípiu Ataúru, Mateus Belo, Autoridade Lokál no komunidade Ataúru.
Ministru Obra Públika, Samuel Marçal agradese ba rai-na’in sira-ne’ebé ho inisiativa rasik hakarak entrega sira-nia rai hodi kontribui ba dezenvolvimenetu.
“Agradese ba rai-na’in sira-ne’ebé mak entrega rai kuaze ektare lima ba fatin konstrusaun solár panél. Ohin ita iha ona desizaun husi rai-na’in entrega ona sira-nia rai hamutuk ektare lima,” Samuel hateten iha nia intervensaun iha ámbitu serimónia lansamentu estrada husi Suku Beloi bá iha Vila Maumeta.
Nia esplika razaun Governu instala solár panél tanba kustu mobilizasaun mina mai iha Ataúru boot kompara ho reseita tama, tanba ne’e mak instala de’it solár panél ho kapasidade 4 megawatt.
“Instalasaun solár panél ho kapasidade 4 megawatt ne’e Austrália mak halo estudu. Ha’u espera katak Janeiru ka Fevereiru 2026 bele loke ona konkursu ba projetu ne’e,” nia tenik.
Nia husu ba joven Ataúru sira hakribii violénsia, kria pás nune’e bele kontribui ba dezenvolvimentu iha Ataúru.
Iha fatin hanesan, Prezidente Autoridade Munisípiu Ataúru, Mateus Belo agradese ba rai-na’in tanba entrega ona sira-nia rai hodi kontribui ba dezenvolvimentu.
“Ida ne’e hatudu katak hakotu nakukun iha Ataúru. Tanba ho instalasaun solár PV tinan ohin ne’e bele estende fornesimentu liña esletrisidade iha Ataúru. Agora daudaun Ataúru foin goza eletrisidade durante oras 18 nia laran, maibé tinan ohin ahi eletrisidade bele lakan oras 24 nia laran,” nia informa.
Entretantu, Primeiru-Ministru, Xanana Gusmáo louva komunidase Ataúru ne’ebé ho inisiativa rasik bele apoia Governu hodi kontribui ba prosesu konstrusaun ba nasaun.
“Husu ba imi tenke hanesan ne’e. Husu nafatin ba imi hatudu imi-nia responsabilidade ba nasaun ida-ne’e. Kuandu ita hamutuk ita sei aselera konstrusaun nasaun ida-ne’e,” nia hakotu.
Jornalista: Natalino Costa
Editór: Xisto Freitas da Piedade
