DILI, 13 Outubru 2025 (TATOLI)–Aplikante vaga Polísia Nasionál Timor-Leste hamutuk na’in-762 iha Munisípiu tuir ezame kulturál.
Segundu Komandante Polísia Nasionál Timor-Leste (PNTL) Munisípiu Baukau, Superintendente Asistente Fasiu de Jesus Lima esplika husi númeru hirak-ne’e totál aplikante ne’ebé pasa iha selesaun dokumentu husi Munisípiu Baukau hamutuk 778, iha-ne’ebé aplikante na’in-16 mak la tuir ezame kulturál ne’ebé realiza iha Eskola Sekundária Jerál numéru II Vila Nova, Domingu (12/10/2025).
“Matéria ezame eskolla de’it A, B, C. Kuandu sira lakon iha ezame prova kulturál, ne’e labele hakat bá-oin,” Superintendente Asistente Fasiu hateten iha Vila Nova.
Notísia relevante: Aplikante ba vaga PNTL iha Vikeke partisipa ezame kulturál
Nia relata aplikante sira tuir ezame kulturál iha-ne’ebé utiliza sala aula 20 no kada sala akumula aplikante na’in-40 ne’ebé akompaña husi fiskalizadór na’in-rua no observa husi delegadu juri husi nasionál no munisípiu inklui pontu-vogál.
“Kona-ba sira na’in-16 ne’ebé la tuir ezame, lakon ona oportunidade tanba data ezame ramata ona,” Fasiu informa.
Entretantu, matéria hotu kona-ba ezame prepara husi Ministériu Edukasaun (ME), serbisu hamutuk ho Komandu PNTL hamutuk pergunta 50 husi matéria neen (6) hanesan Lian Tétun, Portugés, Istória, Jeografia, Konstituisaun RDTL no Matemátika.
Jornalista: Natalino Belo
Editór: Xisto Freitas da Piedade
