DILI, 13 Outubru 2025 (TATOLI)–Ministru Asuntu Kombatente Libertasaun Nasionál, Gil da Costa Monteiro “Oan Soru”, haktuir liuhosi fundu kontributivu kombatente sira-nian mak ohin loron eziste Banco do Nosso Futuro (BNF) ne’e.
“Liuhosi fundu kontributivu mak ohin transforma ona ba Banco do Nosso Futuro (BNF) ne’e,” Oan-Soru dehan ba TATOLI iha Bidau-Lesidere, Dili, Segunda ne’e.
Notísia relevante: BNF nakloke ba timoroan sira atu asesu inklui estranjeiru
Oan-Soru hatutan, ida-ne’e la’o fazeadamente maibé einprinsipiu mak loke uluk banku hodi fó kréditu ba kombatente ne’ebé presiza hadi’a nia moris.
“Ita labele hanoin halo buat haat-lima dala ida, ne’e imposivel. Ita la’o fazeadamente,” Oan-Soru dehan.
Nia tenik to’o fulan-Setembru liubá fundu kontributivu kombatente atinje ona ba millaun $56-resin, hosi totál kombatente 27.629.
Kriasaun Fundu kontributivu ne’e bazeia ba Dekretu-Lei númeru 13/2022, 30 Marsu, ne’ebé hetan promulga hosi antigu Prezidente Repúblika, Francisco Guterres “Lú Olo”.
Jornalista: Osória Marques
Editór: Xisto Freitas da Piedade
