DILI, 13 Outubru 2025 (TATOLI)–Ministru Asuntu Kombatente Libertasaun Nasionál (MAKLN), Gil da Costa Monteiro “Oan Soru”, informa tinan ne’e Ministériu Asuntu Kombatente Libertasaun Nasionál (MAKLN) selu uluk mártir klosan hamutuk 1.230, ne’ebé kada ema sei simu $10.000.
“Sira-ne’ebé mate klosan ne’e foin daudaun ne’e ita aprova ona dekretu-lei, hodi ita selu uluk mártir mate klosan hamutuk 1.230. Ami prevee ba ema 3.000 maibé pur-enkuantu lista ne’ebé iha ami ne’e 1.230 no sira seluk sei prosesu hatama dokumentu,” Oan Soru hateten ba TATOLI, iha Jardín Largo Lesidere, Segunda ne’e.
Oan-Soru dehan sira-ne’e kategoria ba finanseiru úniku, ne’ebé simu dala ida de’it.
“Mártir ne’ebé mate ho idade klosan iha funu-laran durante prosesu luta libertasaun nasionál hahú hosi tinan 1975 to’o 1999, sei hetan apoiu finanseiru úniku hosi Governu,” Oan-Soru dehan.
Membru Governu ne’e hateten durante funu, família ida lakon oan hamutuk rua ka tolu ne’e lei ko’alia klaru hela katak família ida labele simu matebian rua ka tolu nia osan.
Jornalista: Osória Marques
Editór: Xisto Freitas da Piedade
