PAM Kovalima: “Labele husik povu hamlaha iha rai bokur nia leten”
AINARO, 13 Outubru (TATOLI)—Prezidente Autoridade Munisípiu (PAM) Kovalima, Miguel Armada Cardoso, hateten Kovalima iha hanoin ida katak labele husik povu hamlaha iha rai-bokur nia-leten.
“Ami Kovalima iha hanoin ida katak labele husik ita-nia povu hamlaha iha rai-bokur nia-leten. Problema ne’ebé identifika labele hamlaha iha rai-bokur nia leten, ida-ne’e primeiru fila ba ita-nia konsiénsia rasik. Komuniade ne’ebé idade husi 18 to’o 35, idade ne’ebé produtivu tenke badinas tanba ita-nia munisípiu poténsia boot ba agrikultura, ida-ne’e bele hatama reseita ekonómika mai ita,” PAM ne’e hateten ba Agência Tatoli liuhusi progrma Talkshow liuhusi programa HAKBESIK” ho topiku “Hakbesik iha Povu Nia Leet” ne’ebé realiza iha Pauzada Maubisse, segunda ne’e.
Nia dehan, Kovalima iha potensia boot ba agrikultura tuir peskiza ne’ebé Autorudade hamutuk ho tékniku sira halo.
“Kovalima ita hatene katak rai ne’ebé bokur, serve duni ba iha agrikultura nian. Durante ne’e, ita la’o hela, durante ne’e ami identifika rai-bokur iha Kovalima mak hanesan iha Zumalai iha área Bilaku. Produsaun tinan ida-ne’e sa’e uitoan maibé ita hatene produsaun sa’e dalaruma tanba klima no ita-nia preparasaun sira hanesan irrigasaun ne’ebé di’ak. Ita halo mós jestaun ba komunidade oinsá hatene halo sira-nia servisu liuhusi estensionista mak ita-nia produsaun sira bele sa’e,” nia dehan.
Prezidente Autoridade Kovalima ne’e hatutan, produsaun ba haree iha Kovalima tinan 2024 ektare ida (1) konsege hetan tonelada 2,4, maibé iha tinan 2025 konsege sa’e ba tonelada 5,4 kada ektare.
“Ita-nia produsaun haree sa’e liuhusi ita-nia jestaun ne’ebé di’ak, ne’e fatór ekonomia ida hodi apoiu ita-nia munisípiu atu fó-haha ba nia an rasik,” nia hateten.
Nune’e, iha Kovalima konsege kria ona kondisaun lubuk-ida hodi konstroi irrigasaun hodi aumenta tan produsaun haree iha Munisípiu referidu.
“Ami kria ona kondisaun balun hanesan halo ierigasaun ona liuhusi Minstériu Obra Públika (MOP) hato’o mai konsege halo ona irrigasaun iha Lomea. Ida-ne’e bele perkore ona ba Halek ho Beko. Irrigasaun husi Tafara mós ita halo ona fiar katak komunidade sira husi Suai Loro ho Lakona bele halo ona natar fiar katak bele hasa’e tan ita-nia produsaun hare. Ida-ne’e fatór ekonomia ida hodi apoia munisípiu,” nia dehan.
Tuir nia, ho produsaun ne’ebé iha bele responde ba populasaun rihun 90 ne’ebé eziste iha Munisípiu Kovalima.
Jornalista : Hortencio Sanchez
Editór : Cancio Ximenes
