DILI, 13 Outobru 2025 (TATOLI)—Primeiru-Ministru, Kay Rala Xanana Gusmão ne’ebé akompaña husi Vise-Primeiru Ministru, Mariano Assanami Sabino, inklui ekipa husi Sekretária Estadu Formasaun Profisionál no Empregu (SEFOPE) hala’o enkontru ho ekipa Arsebispu Korea, Jung Soon Taek Pedro no padre pároku na’in-16 husi Korea Súl, hodi fortalese kompromisu ba apoiu solidariedade sosiál ba Timor-Leste liuliu traballadór timoroan sira-ne’ebé servisu iha Korea.
Vise-Primeiru Ministru, Ministru Koordenadór Asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino, hateten ekipa arsebispu no padre pároku na’in-16 husi Korea Súl ne’ebé mai halo vizita iha Timor-Leste hodi fortalese kompeomisu atu apoiu solidariedade hanesan fraternidade umana ba Timor-Leste.
Prezensa padre sira-ne’e sei hasoru mós Arsebispu Metropolitana Arkiodioseze Dili, Dom. Virgílio Kardeál do Carmo da Silva inklui líder hotu-hotu, hodi rona no hato’o difikuldade ne’ebé sira akompaña bainhira hamutuk ho timoroan sira-ne’ebé hala’o servisu iha Korea.
“Entaun amu hirak ne’e mak durante ne’e fó apoiu morál no espirituál ba traballadór timoroan sira-ne’ebé mak presiza bainhira enfrenta problema ruma iha Korea. Aleinde ne’e, sira-nia fatin mós sai hanesan fatin halo misa maibé sai hanesan mós fatin kurativu ba atendementu problema sosiál no moras,” Vise Primeiru-Ministru ne’e informa ba jornalista sira iha salaun enkontru MKAE, Palásiu Governu, ohin.
Iha biban ne’e, Arsebispu Korea Súl ne’e relata objetivu husi sira-nia prezensa iha Timor-Leste kona-ba problema sira-ne’ebé akontese ba traballadór timoroan sira iha Korea, tanba ne’e iha enkontru ne’e sira hamutuk buka métodu atu ajusta ba problema ne’ebé mak iha.
“Liuliu problema ne’ebé mak timoroan sira hasoru mak servisu ho ilegál ka halai sai husi sistema, nune’e ami husu ba Governu atu nafatin tau atensaun no prioridade ba traballadór timoroan sira iha Korea nune’e sira labele monu lalais ba iha dalan ilegál nian,” Arsebispu ne’e informa.
Tamba ne’e, sira promete sei kontinua servisu hamutuk ida-ne’e hodi haburas unidade fraternidade umana entre nasaun rua ne’e, liuliu Timor-Leste nia ema (traballadór) sira-ne’ebé mak servisu iha Korea hodi tulun nafatin sira bainhira hetan problema ruma.
Jornalista : Alexandra da Costa
Editór : Cancio Ximenes
