DILI, 13 Outubru 2025 (TATOLI)—Polísia Nasionál Timor-Leste (PNTL) detein ona membru Polísia ho inisiál JLO, ne’ebé tiru nia kaben VFV, iha Domingu (12/10) madrugada maizumenus tuku 04:00, iha Ai-Mutin.
“Ita dezarma kedan ita-nia membru, ita detein kedan iha sela detensaun, agora prosesa ona ba 72 oras iha sela no prosesu ida-ne’e ita-nia invstigasaun nasionál mak sei halo,” Komandante PNTL Munisipiu Dili, Superintendente Xefe Polísia Orlando Gomes hateten ba Jornalista sira iha Komandu Dili, Kaikoli, Segunda ne’e.
Kazu ne’e akontese bainhira membru Polísia halo nia serbisu iha Timor Plaza no fila bá nia uma Ai-Mutin hodi fanun nia kaben atu loke odomatan, maibé tanba loke tarde, entaun mosu dezentendintu oituan.
Tanba JLO ho kondisaun lanu maka nia losu pistola iha nia kanotak no karrega hodi tiru ba nia kaben ain loos to’o ain tohar.
Notísia relevante : Autoridade Uatulari husu Komjer PNTL kontrola membru labele uza arma tiru animál
Hafoin akontesimentu ne’e, família lori kedan vítima ba Hospital Nasionál Guido Valadares (HNGV) hodi halo tratamentu intensivu.
Kazu ne’e rejista ona ba Ministériu Públiku ho NUC 0325/25-PNSIC.
Superintendente Xefe Polísia dehan, relatóriu ba kazu ne’e hasa’e ona Komandu Jerál PNTL atu nune’e bele foti medida kriminál no disiplinár, kontinua prosesa ba Ministériu Públiku, enkuantu medida disiplinar sei enkamiña ba Diresaun Disiplinar Komandu Jerál.
“Atu foti medida disiplinar ne’e tenke haree kazu ne’e ninian sirkustánsia, estuda kazu ne’e mak foin foti desizaun ba membru Polísia atu kona-ba pena saida,” nia akresenta.
Tuir Orlando Gomes, institusaun PNTL ne’e nu’udar instituisaun Estadu atu serbisu ba povu ho nasaun.
“Sasán Estadu nian utiliza atubele apoiu halo seguransa ho di’ak no dignu ba povu. Maibé ita uza sasán Estadu ne’e la tuir lei, ita sei prosesu rigorozu oituan tanba ne’e grave. Sá tán ita halo serbisu, ita mak lanu, ita-nia lei bandu katak ita halo serbisu hemu lanu, tuir lei bainhira ita halo serbisu tenke oin moos para ita atende situsaun seguransa ba ita-nia povu ho di’ak no dignu,” nia katak.
Superintendente Xefe Polísia hato’o, kuandu membru sira utiliza arma sala ne’e tenke prosesa.
“Kona-ba pistola saida mak membru uza tiru nia fe’en, tanba kazu ne’e investigasaun nasionál mak atende, maibé atu dehan de’it katak ita dezarma ona membru ne’e no foti ona nia deklarasaun nomós vítima nia deklarasaun,” nia tenik.
Jornalista : Natalino Costa
Editora : Julia Chatarina
