Populasaun Uatulari 95% asesu ona eletrisidade
VIKEKE, 13 Outubru 2025 (TATOLI)–Administradór Postu Uatulari, Munisípiu Vikeke, Jorge Ribeiro informa populasaun Postu Uatulari pursentu 95 asesu ona enérjia elétrika.
“Daudaun ne’e uma-kain 12.622 (95%) mak asesu ona naroman, hela 5% mak seidauk asesu ba liña eletrisidade,” Jorge Ribeiro dehan ba TATOLI iha Postu Uatulari, Segunda ne’e.
Autoridade Postu Uatulari ne’e aprofunda, husi númeru 5% ne’ebé seidauk asesu ba eletrisidade kompostu husi área Uailalika, Suku Uaitame, área Diribu’u hamutuk uma-kain 55 no Suku Uaitame Makadike uma-kain 200 mak seidauk asesu ba eletrisidade.
“Nune’e, ha’u observa hela área tolu mak seidauk asesu ba liña eletrisidade. Espera tinan oin hanesan ne’e, Governu bele rezolve hodi atinje ba 100%. Maibé, ita nafatin koopera no kolabora ba parte Governu hodibele fó-atensaun ba ita-nia populasaun sira-ne’ebé hela iha área rurál hodi asesu ba dezenvolvimentu liuliu asesu liña eletrisidade,” nia subliña.
Iha parte seluk, Reprezentante Prezidente Autoridade Munisípiu Vikeke, Luís António husu atu aprezenta dadus uma-kain ne’ebé seidauk asesu ba liña eletrisidade.
“Ami husu parte Autoridade Uatulari aprezenta dadus uma-kain ne’ebé seidauk asesu ba liña eletrisidade ba Prezidente Autoridade Munisípiu Vikeke, atu enkamiña ba nasionál hodi haree asuntu referidu nune’e bele konklui liña eletrisidade iha Postu Uatulari. Tanba iha ukun-aan ida-ne’e ita hakarak ema hotu-hotu goza,” nia akresenta.
Nia husu populasaun iha Postu Uatulari nafatin kolabora ho Governu nia programa sira-ne’ebé planeadu ona. Karik programa sira-ne’e tama iha aldeia, suku no postu labele halo impedimentu, maibé hamutuk hodi lori dezenvolvimentu iha baze.
Tuir dadus, populasaun Postu Uatulari suku ualu (8) kompostu husi Makadike de Baixo, Makadike de Cima, Makadike Uaitame, Matahoi, Uaitame, Afaloikai, Balulo no Vessoru. Totál populasaun 1.394 ho nia uma-kain 12.622.
Jornalista: Vitorino Lopez da Costa
Editór: Xisto Freitas da Piedade
