AINARO, 13 Outubru 2025 (TATOLI)—Prezidente Repúblika, José Ramos-Horta, esplika papel importante órgaun soberania nasaun nian ba komunidade iha Postu Administrativu Maubisse, Munisípiu Ainaro.
“Ita iha órgaun soberania haat (4) mak Prezidente Repúblika, Parlamentu Nasionál, Governu no Tribunál, sira-ne’e tenke servisu hamutuk np komprende malu,” Prezidente Ramos-Horta hateten liuhusi programa TATOLI HAKBESIK ho topiku “Prezidente Ramos-Horta ho Povu” ne’ebé realiza iha Pauzada Maubisse, segunda ne’e.
Nia dehan, orgaun haat (4) ne’e hanesan ai-riin nasaun nian no presiza hamutuk hodi lori nasaun ne’e ba oin maibé labele sai opozisaun ba malu.
“Sira balun husu ha’u atu sai fali opozisaun ba Governu, ne’e labele maibé tenke servisu hamutuk. Dalabarak Parlamentu ho Governu haruka lei balun mai ha’u la presiza estuda ho tempu naruk. Kuandu lei ne’e la boot-liu Konstituisaun tenke promulga no hein tan saida. Se lei ne’e boot liu fali konstituisaun mak ha’u tenke veta, maibé ha’u nia mandatu seidauk veta lei-ida. Ha’u haree importante promulga atu nune’e Governu implementa,” Horta esplika.
Nia hatutan, servisu hamutuk entre Prezidente ho Governu mak kada semana sempre halo reuniaun ho Primriru-Ministru, Kay Rala Xanana Gusmão.
“Kada kinta-feira, ha’u enkontru ho Primeiru-Ministru, ida-nee atu ko’alia ba malu kona-ba servisu sira-ne’ebé Governu halo no asuntu importante sira kona-ba ita-nia nasaun enfrenta,” Horta dehan.
Jornalista : Hortencio Sanchez
Editór : Cancio Ximeens
