MAUBISSE, 13 Outubru 2025 (TATOLI)—Prezidente Repúblika, José Ramos-Horta, hateten odamatan iha Palásiu Prezidensiál no nia uma privadu nunka taka ba ema sé de’it atu hasoru nia.
Prezidente Ramos-Horta hato’o deklarasaun ne’e bainhira sai oradór prinsipál iha programa ‘Ramos-Horta ho povu’ ne’ebé realiza husi Agência TATOLI, I.P hodi halo diálogu ho komunidade iha Pauzada Maubisse, Munisípiu Ainaru, liuhusi programa “Prezidente Ramos-Horta ho Povu”, liuhusi programa ‘TATOLI HAKBESIK’ hodi hakbesik Estadu ba povu.
“Ha’u-nia odamatan nunka taka ba ema sé de’it, ba labarik kiikoan, povu baibain sira, partidu polítiku sira tantu Governu no opozisaun,” Ramos-Horta hateten.
Nia dehan, durante sai hanesan Prezidente Repúblika konsege ajuda ona ema barak ne’ebé inan-aman agrikultór.
“Labarik barak mak ba iha hau-nia fatin, ha’u ajuda sira lubuk ida. Ba sira, Universitáriu sempre ajuda laptóp ba sira maibé ba sira-ne’ebé inan-aman agrikultura. Sira-ne’e ba feto de’it oinsá ajuda sira-nia estudu. Dalaruma ha’u hola tiha laptop, tau iha kareta laran, halai liu eskola Universidade sira hetan sira para husu, ó foti fakuldade saida. Sira hatán, ha’u husu tan ó-nia inan-aman servisu saida. Sira dehan agrikultor, ha’u hatene sira osan araska. Ha’u husu ó iha laptop, nia hatán laiha, ha’u foti laptop fó kedan no nia hakfodak. Sra-ne’e mak ha’u ajuda no barak tan,” Ramos-Horta dehan.
Nia hatutan, dalabarak ajuda mós labarik kiikoan sira iha Dili, Hera no Oekusi hodi loke Dapur ba Povu hodi fó han labarik kiikoan sira.
“Ha’u halo Dapur ba povu, ida-ne’e ho osan privadu no osan balun ajuda husi ha’u-nia amigu sira rai-li’ur. Ema barak dehan loloos ajuda labarik sira-ne’e Governu nia servisu, oinsá Prezidente tenke halo fali ida-ne’e. Maibé, ha’u halo ne’e ho fuan, ho laran atu ajuda ema ki’ak sira, ajuda povu baibain sira-nia oan,” nia hateten.
Jornalista : Hortencio Sanchez
Editór : Cancio Ximenes
