VIKEKE, 13 Outubru 2025 (TATOLI)—Diretór Servisu Seguransa Alimentár Munisípiu (SSAM) Vikeke, Leanto Gomes apela ba negosiante sira iha Munisípiu Vikeke atu labele fa’an produtu nesesidade bázika sira-ne’ebé liu prazu ba komunidade.
“Ami hakarak apela ba negosiante sira iha Munisípiu Vikeke ne’ebé fa’an ai-han tenke hqree ninia prazu sira. Karik prazu liu entaun soe tiha. Tanba fó impaktu ba komunidade nia saúde,” Leanto Gomes dehan ba TATOLI, iha resintu Munisípiu Vikeke, Segunda ne’e.
Leanto aprofunda, SSAM Vikeke sei kontinua halo inspesaun no monitorizasaun ba negosiante sira-nia fatin hanesan kioske, restorante no loja sira-ne’ebé eziste iha Munisípiu Vikeke.
“Ami halo monitorizasaun no fiskalizasaun ba ita-nia ajente operadór ekonómiku sira liuliu kioske, loja no restorante atu haree ba ai-han sira-ne’ebé la merese atu fa’an ba ita-nia komsumidór sira. Ami mós partilla informasaun ba ita-nia operadór ekonómku sira atu tau loron espira iha produtu sira no tinan produsaun,” nia subliña.
Nune’e, nia prefere negosiante labele fa’an ikan, ayam potong, sosis, na’an sira-ne’ebé iis ona labele fa’an ba komsumidór. Bainhira la kumpre, SSAM Vikeke hetan sei koordena ho parte relevante sira hodi rekolla.
“Tanba iha fulan kotuk ami hamutuk ho parte AIFAESA halo inspesaun konsege rekolla produtu sira-ne’ebé liu prazu ne’e barak. Ami halo tiha destruisaun ba iha fatin lixu. Iha fulan-Setembru, ami halo inspesaun identifika operadór ekonomia loja 20 mak viola regra tanba sira fa’an produtu liu espira,” Leanto relata.
Nia dehan, kuandu identifika loja sira fa’an sasán liu prazu parte relevante sei foti medida ba negosiante sira-ne’ebé komete infrasaun.
“Bá-oin ami sei kontinua halo inspesaun ba operadór ekonómiku sira-nia atividade iha Vikeke. Ami planu ne’e kada fulan halo inspesaun dala-rua ba negosiante sira-nia fatin tuir lei ne’ebé vigora,” nia dehan.
Tuir dadus, iha fulan-Setembru tinan ne’e ekipa AIFAESA no ekipa Munisípiu Vikeke rekolla produtu sira-ne’ebé liu prazu hamutuk 247, ne’ebé halo ona destruisaun, kompostu husi produtu alimentár no naun-alimentár hanesan supermie, pop-ice, aquase, ikan plástiku, manu kelen, sabraka no seluk tan.
Jornalista: Vitorino Lopez da Costa
Editór : Xisto Freitas da Piedade
