OEKUSI, 14 Outubru 2025 (TATOLI) –Totál estudante ne’ebé atu partisipa iha ezame nasionál loron 20 Outubru ne’e hamutuk 3.112, Diretór Diresaun Rejionál Edukasaun no Solidariedade Sosiál, Vincencio Cono, informa.
Nia esplika, husi númeru ne’e kompostu husi Ensinu Báziku Sentrál (EBC) 1.602, Eskola Sekundáriu Jerál (ESG, sigla portugés) 1.062 husi Siénsia Teknolojia 554 no Siénsia Sosiál 508, Ensinu Tékniku Vokasionál 448.
“Preparasaun ami hala’o ona antes. Ha’u konvida ona dirijente eskola sira hotu, mai enkontru. Ajenda primeiru forma ekipa komisaun atu responde ba ezame nasionál iha semana oin, depois konfirma ikusliu ba lista kandidatu sira, entaun agora ita kontinua prepara,” nia dehan iha Oekusi, ohin.
Notísia relevante:Edukasaun Munisipál Ainaru rejistu finalista 2.295 tuir ezame nasionál
Iha biban ne’e, Diretór Vincencio Cono apela ba dirijente eskola, inan-aman inklui estudante no profesór vijilante sira, atu kumpre regra no motiva oan sira atu labele mete seremónia iha kalan no kuida atu evita dezastre naturál.
“Semana oin ita hahú ezame nasionál no ezame lokál iha nível ensinu báziku, ensinu sekundáriu no tékniku vokasionál, tanba ne’e husu primeiru inan-aman sira atu aplika edukasaun informál katak atu haree oan sira, evita nia movimentasaun atu evita mós dezastre oioin, segundu husu ba estudante sira estuda maka’as liu-liu matéria ne’ebé aplika durante prosesu aprendizajen simu ona liu-liu matrix ezame nasionál ba tinan ne’e atu labele lakon futuru,” nia énfaze.
Terseiru, husu ba profesór sira hotu liu-liu ba profesór vizilante sira, atu labele akontese tan, signifika ita evita erru sira-ne’ebé tinan enfrenta maka estudan sira-nia folla resposta bainhira ba to’o iha nasionál foin bele haruka atu buka tuir iha eskola idak-idak.
“Tanba ne’e, regulamentu depois atensaun no kolaborasaun di’ak iha eskola destakadu nu’udar vijilante no mós parte ekipa verifikasaun folla resposta no agravamentu atu folla ne’e labele ku’ak liu-liu pontu lima sensitivu iha folla resposta, husu ba vijilante sira atu kumpre mós regra sira-ne’ebé regula ona iha ezame nasionál liu-liu ba pontualidade, nune’e labele prejudika andamentu ezame nian,” nia fó hanoin.
Nu’udar dirijente edukasaun iha Oekusi, fó ba parte dirijente eskola, atu bele mantein kontrola vijilante sira, liu-liu ba sub-komisaun sira formada ona iha kada eskola, nune’e labele lakon sira-nia tempu ba fatin serbisu, maibé kolabora di’ak ho vijilante no estudante sira.
Ezekutivu ne’e informa, estudante sira-ne’ebé hetan dezastre ka impedimentu ruma iha ámbitu ezame nasionál, sei tama iha ezame segunda xamada, bainhira la marka prezensa iha ezame segunda xamada, konsidera lakon no esklui husi ezame nasionál tinan-2025 ne’e.
“Estudante sira proibi atu minutu 15 depoizde ansi fila, mezmu resposta hotu ona, maibé presiza hein oras to’o ramata, verifikasaun hotu depois mak parte sub-komisaun mak haruka, mak foin bele sai husi sala ezame, tanba dalaruma akontese tanba ansi estudante balun la hakerek naran ho númeru emix inklui pontu balun la konsege marka no la responde,” nia hakotu.
Notísia relevante:Edukasaun Kovalima rejista estudante 2.000 preparadu tuir ezame Nasionál
Jornalista: Abílio Elo Nini
Editór: Rafael Ximenes de A. Belo
