Jorge Paiva ho Agapito da Conceição eleitu ba Komisáriu KFP
DILI, 14 Outubru 2025 (TATOLI) – Jorge Paiva Araújo no Agapito da Conceição, eleitu ona ne’ebé reprezenta Parlamentu Nasionál (PN) asume knaar ba Komisáriu iha Komisaun Funsaun Públika (KFP) ho mandatu tinan-lima.
Kandidatu na’in-rua ne’e aprezenta husi bankada CNRT ho FRETILIN ho lista únika, liuhusi prosesu eleisaun eskrutínu ho votu a-favór 54, kontra 0 no abstensaun neen.
“Ne’ebé pasa. Tempu badak bele fó pose ba ita-nia reprezentante ba Komisaun Funsaun Públika,” Prezidente Parlamentu Nasionál, Deputada Maria Fernanda Lay, fó-sai iha sala plenária Parlamentu, tersa ne’e.
Lidér masimu órgaun soberania daruak ne’e, hateten kandidatu na’in-rua iha kapasidade atu reprezenta uma fukun.
”Kandidatu Paiva, ita-nia tékniku superiór iha Parlamentu no tékniku iha Komisaun A {Konstituisionál no Justisa} no Agapito uluk aprenzenta ona kandidatu agora re-kandidata fali, ita la presiza lee sira-nia kurríkulu, ema sira ne’ebé kualifikadu timoroan di’ak mak Parlamentu hili,” nia dehan.
KFP hanesan instituisaun independente harii ho baze ba lei númeru 7/2009, 15 Jullu , hanesan órgaun responsavel atu regula no asegura funsaun públika ida-ne’ebé imparsiál, livre hosi interese polítiku sira, profisionál, baze ba méritu, presta serbisu ho kualidade no proporsionalidade ba povu Timor-Leste.
Komisaun ne’e kompostu husi membru na’in-lima, na’in-rua eleitu husi Parlamentu Nasionál no na’in-tolu hetan nomeasaun husi Governu, ne’ebé maka nomeia mós Prezidente.
Jornalista: Nelson de Sousa
Editór: Evaristo Soares Martins
