Kondisaun koziña EBF Ualake aat, difikulta PME
VIKEKE, 14 Outubru 2025 (TATOLI)—Koordenadór Ensinu Báziku Filiál (EBF) iha Aldeia Sana, Suku Uaitame, Postu Administrativu Uatulari, Munisípiu Vikeke, António Silveiro Amaral relata kondiasaun koziña iha EBF Ualake daudaun aat hodi difikulta preparasaun ai-han ba Programa Merenda Eskolár (PME).
“Problema ne’ebé daudaun ne’e ami hasoru iha ami-nia eskola mak fatin koziña ba Ekipa Jestaun Programa (EJP) merenda eskolár aat. Udan tama de’it ba koziña laran tanba kalen aat ona,” António Silveiro Amaral ba TATOLI iha EBF Ualake Sana, Tersa ne’e.
António solisita Servisu Edukasaun Munisípiu Vikeke no Autoridade Munisípiu atu tau-matan ba asuntu ne’e, nune’e bele asegura ai-han ba estudante sira.
“Ha’u hakarak hato’o ba parte relevante sira tau-matan ba ami-nia fatin koziña. Se bele konstrui foun atu ami uza ba programa merenda eskolár. Kada tinan ita realiza programa merenda eskolár maibé ita-nia fatin atu te’in aat hela. Problema sira-ne’e ha’u aprezenta beibeik ba edukasaun no superitendente sira mós mai haree direta ona ami-nia fatin maibé to’o agora ami seidauk rona rezultadu ruma,” nia tenik.
Aleinde ne’e, nia relata, implementasaun programa merenda eskolár ba tinan 2025 iha EBF Ualake tuir menu ne’ebé define ona iha matadalan.
Tuir dadus, estudante EBF Ualake kompostu husi primeiro ano to’o sesto ano ho totál estudante hamutuk na’in-90 no totál profesór ativu hamutuk na’in-haat kompostu husi feto ida no mane na’in-tolu.
Jornalista: Vitorino Lopez da Costa
Editór: Xisto Freitas da Piedade
