DILI, 14 Outubru 2025 (TATOLI)—Komisaun Permanente ba Rekrutamentu Kontratadu (CPRC) Ministériu Saúde no Komisaun Rekrutamentu Institutu Nasionál Farmasia Produtu Mediku (INFPM) klarifika ba públiku katak rekrutamentu ne’ebé loke iha INFPM ne’e ba sidadaun Timor-Leste iha direitu atu konkorre.
Komisaun Permanente ba Rekrutamentu Kontratadu (CPRC) Ministériu Saúde ho Komisaun Rekrutamentu INFPM hakarak informa ba públiku kona-ba asuntu ne’ebé hetan atensaun iha mídia sosial no komunidade, liuliu ba kandidatu ida-ne’ebé moris iha Indonézia, espesialmente iha Atambua no fatin seluk tan.
Ekipa INFPM akompaña husi CPRC hala’o abertura simu dokumentu aplikante sira-nian relasiona ho vaga ne’ebé intituisaun ida-ne’e fó sai iha 01-12 Outubru 2025, hodi rekruta timoroan sira iha área espesifiku atu bele mai hala’o servisu hodi haforsa sistema nasionál saúde partikularmente iha INFPM.
“Atu klarifika ba públiku katak aplikante hirak ne’e elejível tanba komisaun rekrutamentu konfirma ho dokumentu katak kandidatu hirak ne’e sidadaun Timor-Leste inklui na’in-tolu ne’ebé moris fatin iha Indonézia ka iha rai-li’ur. Nu’udar sidadaun Timor-Leste, sira mai ho dokumentu sidadania kompletu no válidu tuir lei no tuir rekezitu importante sira-ne’ebé CPRC fó sai iha avizu. Aleinde ne’e, kandidatu iha dokumentu komprovativu seluk hanesan diploma ka perkursu akadémiku no formasaun ne’ebé verifika no valiadu tuir kritéria rekrutamentu ofisiál,” Prezidente CRPC iha Ministeriu Saúde, Marta Abenia P. da C. Santos, dehan iha konferénsia imprensa ne’ebé hala’o iha INFPM, Kampung Alor, ohin.
Nia esplika, iha rekezitu importante ne’ebé momentu fó iha anúnsiu ba aplikante ne’ebé presiza submete mak hanesan sidadaun timoroan ho idade 17 to’o 55, karta rekerimentu asina husi rekerente hodi dirije ba Prezidenti Komisaun Permanente ba Rekrutamentu Kontratadu (CPRC), kurikulu Vitae (CV) ho referénsia husi ema na’ in-rua (2), fotografia koloridu 3×4 tahan rua, deklarasaun bom komportamentu husi Ministériu Justisa, atestadu médiku husi Hospital Nasional Guido Valadares, fotokopia koloridu diploma/Ijazah legalizadu husi Ministériu Edukasaun no Ministériu Ensinu Superiór.
“Aplikante rejime espesial teke fotokopia kartaun profisionál ne’ebé sei válidu Fotokopia Sertidaun RDTL, Fotokopia Kartaun Eleitoral ka Billete Identidade (BI), Fotokopia Sertifikadu formasaun profisionál ne’ebé mensiona ha CV, Rejime espesiál dokumentu tau iha Stopmap kór mean, rejimi jerál stopmap kór matak,” nia relata.
Nia hatutan, kandidatu hirak ne’e ho naran Iliu N.A. de Jesus ne’e moris iha Atambua 1999, oan husi Felix de Jesus no Madalena Mesquita Araújo orijinalidade husi Munisípiu Aileu, Ramon Evaristo Mendonça, moris iha Semarang iha tinan 2002, Bonifácia da Graça Abi, Indonézia iha tinan 1999 no Deonisia no ida seluk tan moris iha Tanjung Karang, Indonézia.
Sira-ne’e iha direitu legál hodi partisipa iha prosesu selesaun hanesan aplikante sira seluk ne’ebé kumpre kritéria legál.
“Hakarak kompleta tan informasaun katak iha prosesu simu dokumentu ne’e totál aplikante hamutuk 782, kompostu husi rejime jerál 324 no rejime espesial 458. Husi totál aplikante 782 iha 251 mak la admitidu, tanba la prienxe rekezitu ne’ebé komisaun CPRC hatour ona. Aplikante na’in-531 mak admitidu hodi bele tuir teste eskrita ne’ebé sei hala’o iha kuarta-feira, 15 outubu 2025,” nia dehan.
Nia haktuir, vaga ne’ebé fó sai hamutuk 14 ne’ebé kompostu husi Apoteker, Tékniku Farmásia, Analista Farmásia, Tékniku Laboratóriu, Farmakolojista, Tékniku Nutrisaun, Tékniku Administrasaun, Tékniku Eletrisidade, Tékniku Enjeñaria, Supervizor Tékniku Konstrusaun, Tékniku Operadór Oxijéniu, Responsavel Setvisu Administrasaun no Lojístika, Tékniku Apoiu Produsaun no Distribuisaun Oxijéniu, Motorista Transporta Oxijéniu.
Ministériu Saúde liuhusi CPRC reafirma nia kompromisu atu kontinua implementa prosesu rekrutamentu tuir prinsípiu transparénsia, ekilibru no méritu, hodi garante oportunidade hanesan ba ema timoroan hotu.
Prezidente Komisaun Rekrutamentu INFPM, Miguel Soares, hateten atu aumenta tan deklarasaun sira-ne’ebé mak Komisaun Permanente ba Rekrutamentu Kontratadu (CPRC) Ministériu Saúde fó sai katak prosesu rekrutamentu ida-ne’e bazeia ba nesesidade no rekursu umanu ne’ebé tuir planu 2025 ne’e INFPM atu halo rekrutamentu ba rejime espesiál no rejime jerál.
“Prosesu rekrutamentu dahuluk ami komisaun rua tuur hamutuk hodi define rekezitu sira no hotu ida-ne’e ami anúnsiu ba públiku. Sé de’it ba sidadaun timoroan iha direitu atu mai kompete, maibé tenke prienxe rekezitu ne’ebé mak ami fó sai. Importante ida mak nia tenke sidadaun Timor. Entaun, iha momentu ami loke vaga iha publiku kuaze 782 mak hatama CV. Husi ne’e, semana ida nia laran, ami simu sira dokumentu no depois ami halo kedas examinasaun ba sira-nia CV hotu-hotu bazeia ba formatu ezaminasaun ne’ebé ami komisaun rua prepara,” Miguel esplika.
Nia afirma, rekezitu sira-ne’e mak ema tenke sidadaun Timor mak nia tenke iha kartaun eleitoral, pasaporte no Bilete identidade, daruak nia tenke iha lisensiatura área ne’ebé mak ami presiza, entaun iha ne’eba ami define kedas katak husi rezultadu examinasaun ba dokumentu sira-ne’e mak valór 70 mai kraik sira-ne’e la pasa, maibé valor 70 ba leten pasa ba iha prosesu kontinuasaun ba exame eskrita.
Jornalista : Felicidade Ximenes
Editór : Canco Ximenes
