MS sei halo investigasaun ba estudante UNTL vasina bebé ida mate
DILI, 04 Novembru 2025 (TATOLI)—Ministériu Saúde sei halo investigasaun ba estudante estajiadu finalista husi Universidade Nacional Timor Lorosa’e, tanba vasina bebé ida nia ain to’o raan no ikus mai hakotu iis.
Diretór Servisu Saúde Munisípiu Likisá Luís Manuel, hateten infomasaun ne’ebé espalla iha média sosiál ne’e loos, tanba ne’e mak ohin Servisu Saúde Munisípiu Likisá hatama tiha ona karta ba Ministériu Saúde atu halo investigasaun ba kazu ne’e.
“Infomasaun ne’e loos, akontese iha loron 29, estudante estajiadu finalista husi Universidade Nacional Timor Lorosa’e no karta ohin haruka ona ba Ministériu ona, depois Ministériu sei forma ekipa ida tun mai mak halo investigasaun. Sedu ka tarde, ekipa tun halo investigasaun kona ba kauza loloos bebé mate ne’e,” Luís Manuel ba Jornalista sira liuhusi telefónika, ohin.
Nia dehan, daudaun ne’e Servisu Saúde Munisípiu Likisá hato’o ona relatóriu ba Ministériu Saúde depois investigasaun mak bele hatene nia kauza lolos ne’e oinsá.
“Ami hato’o tiha ona relatóriu ba Ministériu, depois ekipa husi GIAS mak sei halo investigasaun depois mak ita sei hatene nia kauza ne’e, tanbasá bebé ne’e mate,” nia dehan.
Nia informa, bebé ne’e foin halo ba semana neen (6) ne’e nia mai ho família simu vasina imunizasaun dahuluk nian.
“Atu hateten de’it, bebé ne’e mai atu simu vasina primeiru no mós hemu poli primeiru, família sira lori nia mai liu husi triajen, haree tiha hotu haruka mai iha sala imunizasaun, tanba liuhusi triajen ne’e depois sira indika mai iha sala imunizasaun, iha ne’ebá iha ai-moruk oin tolu ida hemu no sona mak rua. Depois sona hotu, nia haruka ba foti ai-moruk fila ba uma, liu minutu 12 bebé ne’e mai fali ho raan,” nia informa
Nia esplika, daudaun ne’e estudante estajiadu ne’e hein hela investigasaun no sira hasai tiha ona nia Indentidade.
Iha fatin hanesan, Vise- Ministru Fortalesimentu Instituisionál Saúde, José Mango dos Reis, informa Minsiteriu Saúde seidauk simu karta husi Servisu Saúde Munisípiu Likisá, maibé dalaruma ohin mak simu maibé fó ona orientasaun atu halo investigasaun ba kazu refere.
“Ami seidauk simu relatóriu, maibé ha’u fó ona orientasaun atu halo investigasaun la’o hela. Se keta ha’u mai tiha ne’e karik reuniaun KM ne’e mak sira haruka karik,” José Mango dos Reis hateten ba Jornalista sira hafoin Partisipa Konsellu Ministru.
Nia dehan, sira seidauk haruka relatóriu mai tanba sira presiza hetan infomasaun husi Hospitál Nasionál Guido Valadares no Servisu Saúde Munisipiu Likisa, atu hatene karik iha investigasaun la’o mak hetan erru balun sei haree.
“Ita harre took investigasaun ne’e se iha erru ruma orsida ita sei haree hamutuk,. Tnba ha’u la bele dehan lai, mais bainhira membru ida mak lakon membru ida, família mak la kontente. Ho ida-ne’e, husik ba investigasaun la’o tiha no haree mós tiha mak depois ita fó hatene, mais ita lakon ema ida mate ona,” nia informa.
Tanba ne’e, Ministériu Saúde husu halo investigasaun tenke lalais tanba ekipa ne’e forma ba imunizasaun nian.
“Ekipa ne’e ita nia pesoál saúde sira halo ba labarik na’in-16, la’ós ida de’it. Sira na’in-16, soké to’o iha ida mak vasina tiha hotu, liutiha momentu balun, nia raan sai fali husi fatin vasina ne’e, depois sira halo tiha intervensaun iha sentru saúde Likisá hafoin sira deside haruka mai iha Hospoitál Nasionál Guido Valadares. Mai to’o iha ne’e mak bebé oan husik hela iis, tanba ne’e investigasaun la’o hela depois mak sei fó sai ba públiku hodi bele hatene,” nia dehan.
Bebé nia identidade ho naran inisiál GNS, husi Munisípiu Likisá ho idade foin semana neen.
Jornalista : Felicidade Ximenes
Editór : Cancio Ximenes
