MSSI-BNCTL finaliza ona pagamentu pensaun sosiál ba idozu no invalidés iha Kovalima
KOVALIMA ,14 Outobru 2025 (TATOLI) – Ministériu Solidariedade Sosiál no Inkluzaun (MSSI) Servisu hamutuk ho Banku Nasionál Komésiu Timor-Leste (BNCTL) finaliza ona halo pagamentu pensaun sosiál (PS) ba idozu no invalidez, iha munisípiu Kovalima.
Xefe Suku Kamnasa, Postuu Suai, Munisipiu Kovalima, Fernando Noronha, relata katak dadus benefisiáriu husi suku Kamnasa hamutuk 300-resin husi númeru 200-resin foti direita ona pensaun sosiál iha Banku.
“Razaun balun foti uluk pensaun sosiál ba direta hodi hasoru ajenda pagamentu iha banku tanba ita hatene ida-ne’e depende mós benefisiáriu sira-nia nesesidade,” Lideransa komunitária ,Fernando Noronha ba jornalista sira iha Kamnasa.
Tuir oráriu ne’ebé maka fó sai husi Banku Nasionál Komérsiu Timor-Leste (BNCTL), pagamentu pensaun sosiál faze datoluk ba benefisiáriu idozu no invalidez iha Munisípiu Kovalima hahú iha loron 9 Outobru finaliza iha loron 13 Outobru.
Iha sorin seluk, Benefisiáriu husi Kamnasa, António Relvas, sente kontente tanba kada trimesterál Governu halo pagamentu ba pensaun sosiál ba idozu sira nune’e bele sustenta nesesidade família no selu oan nia eskola.
“Daudaun pagamentu ba faze datoluk ne’e ha’u simu pensaun sosiál husi Governu ba fulan tolu hamutuk $180.00 osan ne’ebé maka ha’u simu balun uza ba selu ha’u nia-oan nia eskola balun uza ba nesesidade uma laran”, nia dehan.
Benefisiáriu ba Pensaun Sosiál (PS) hamutuk 7,257 husi númeru ne’e sai benefisiáriu ba idozu hamutuk 6,874 no benfisiáriu ba invalidés hamutuk 383 mai husi postu administrativu sira hanesan Fatululik, Fatumea, Fohorem, Tilomar, Maucatar ,Suai no Zumalai.
Dadus atuál ba pagamentu pensaun sosiál ba faze datoluk hamutuk na’in- 7,257 mai husi postu administrativu hitu mak hanesan postu administrativu Fatululik benefisiáriu na’in-251,Fatumea 501,Fohorem 570,Maucatar 1.076 ,Suai 2.180,Tilomar 835 no Zumalai 1.837.
Jornalista:Celestina Teles
Editór:Florencio Miransa Ximenes
