DILI, 14 Outobru 2025 (TATOLI)—Ministru Transporte no Komunikasaun (MTK), Miguel Gonçalves Manetelu, hateten sira esforsu atu rezolve problema funsionamentu semáforu ne’ebé la funsiona ka avaria iha Dili laran.
Nia hatutan, ba asuntu ne’e presiza koordena mós ho Ministériu Obra Públika atu nune’e bainhira iha prosesu reabilitasaun estrada iha kapitál Dili labele fó impaktu ba liña eletrifikasaun semáforu nian.
“Ami identifika ona fatin hirak ne’ebé semáforu la funsiona, hanesan ita boot sira haree iha Villa Verde, Kolmera, Balide no Kuluhun, maibé tanba foin dadauk prosesu reabilitasaun estrada entaun sira kee halo kotu liña eletrifikasaun sira hotu, tanba ne’e mak la funsiona ne’e,” Ministru Manetelu informa ba Agência Tatoli, iha nia kna’ar fatin, ohin.
Tamba ne’e, nai dehan, presiza koordenasaun ho Ministériu Obra Públika atu haree sira-nia planu no meta kona-ba reabilitasaun estrada urbana iha Dili laran, se lae hadi’a tiha semáforu sira maibé bainhira Governu kontinua halo reabilitasaun estrada entaun sei halo estraga fali eletrifikasaun ne’ebé monta ona.
“Di’ak-liu ita hein lai prosesu reabilitasaun estrada urbana sira ramata ona foin ita kontinua hadi’a. Nune’e mós ita iha planeia atu monta fali sistema semáforu modernu tanba ne’e mak ita seidauk implementa, inklui mós zebra croos ne’ebé tinta lakon hotu ona ne’e,” moa hateten.
Kestaun hirak ne’e la presiza tinan oin mak rezolve ka tau iha programa tinan 2026 nian, maibé sira define hotu ona hein halo koordenasaun hodi kontinua implementa atu labele halo engrafamentu.
Jornalista : Alexandra da Costa
Editór : Cancio Ximenes
