DILI, 14 Outubru 2025 (TATOLI)—Fundu Dezenvolvimentu Kapitál Umanu (FDCH), Tersa ne’e, dezloka tan bolseiru na’in-sia (9) bá Malázia hodi hala’o estudu iha Universidade Kuala Lumpur.
“FDCH haruka bolseiru sira bá estudu iha área biomedikál no nutrisaun. Nune’e, bainhira ramata sira-nia estudu filamai bele ajuda ita-nia povu no Estadu ida-ne’e iha área ne’ebé sira foti,” Diretór Fundu Dezenvolvimentu Kapitál Umanu, Júlio Aparício hateten ba jornalista sira iha Aeroportu Internasionál Nicolau Lobato, Komoro, Tersa ne’e.
Diretór ne’e tenik semana oin bolseiru na’in-39, ne’ebé sei dezloka tan bá Malázia iha área petróleu, IT, sybersecurity, ospitalidade no turizmu.
“Agora ita dezloka na’in-sia (9), maibé semana oin sei dezloka tan bolseiru na’in-39 bá Malázia. Entaun, tinan ne’e ba Malázia iha bolseiru hamutuk 62 ho sira ba antes. Aleinde ne’e, iha fulan-Novembru bolseiru na’in-34 sei dezloka mós bá hala’o estudu iha área agrikultura no edukasaun,” nia dehan.
Júlio Aparício hein katak bolseiru sira-ne’e sei ramata estudu tuir tempu ne’ebé mak iha ona.
Entretantu, ba tinan ne’e FDCH nia bolseiru hamutuk na’in-184, husi instituisaun Governu hanesan Ministériu Ensinu Superiór Siénsia no Kultura (MESSK) na’in-sanulu (10), Administrasaun Nasionál Aéreu Timor-Leste (ANATL) na’in-30, Ministériu Saúde (MS) na’in-30.
Iha fatin hanesan, Bolseiru Suzana Filomena Pereira konsidera ida-ne’e hanesan oportunidade ne’ebé di’ak, atubele bá kontinua estudu iha estranjeiru.
“Bolsu ida-ne’e hanesan oportunidade ida di’ak tebes ba ami hodi hasae tan ami-nia kapasidade no abilidade, nune’e filamai bele kontribiu ba ita-nia nasaun,” nia hateten.
Estudante ne’e subliña nia parte sei bá hala’o esutudu iha área nutrisaun no kompromete sei hala’o estudu tuir tempu ne’ebé determinadu.
Entretantu, bolseiru na’in-sia (9) ne’e nu’udár bolseiru bolsa kompletu FDCH nian ho programa estudu lisensiatura iha área estudu nutrisaun no biomedikál.
Jornalista: Osória Marques
Editór: Xisto Freitas da Piedade
