DILI, 14 Outubru 2025 (TATOLI)-Parlamentu Nasionál (PN), aprova ona pedidu dezlokasaun ofisiál Prezidente Repúblika (PR), José Ramos-Horta, bá Malázia, entre 24 no 29 Outubru 2025.
Pedidu Xefe Estadu nian ne’e hodi partisipa iha Simeira Xefe Estadu no Governu Asosiasaun Nasaun Sudeste Aziátiku (ASEAN, siglá inglés) ne’ebé sei realiza iha Kuala Lumpur, Malázia iha loron 26 fulan Outubru, tinan ne’e.
“Rezultadu votasaun a favór 44, kontra 0 no abstensaun tolu, ho ida-ne’e pasa,” Prezidente Parlamentu Nasionál, Deputada Maria Fernanda Lay, fó sai iha sala plenária, tersa ne’e.
Iha pedidu Xefe Estadu nian hato’o katak, Timor-Leste iha adezaun ba ASEAN remonta iha Juñu 1974, bainhira halo reuniaun iha Jakarta ho Ministru Negósiu Estranjeiru Indonézia, Adam Malik.
Husi ne’e aspirasaun akontese firme, koerente no inabalável, reflete kompromisu Timor-Leste ho ideia kooperasaun, estabilidade no prosperiedade rejionál.
Hafoin tinan-23 restaurasaun independénsia, país konkretiza ninia adezaun formál ida ne’e prestijioza organizasaun rejionál, marku extraordináriu relevánsia iha prosesu integrasaun plena país iha komunidade Nasaun Sudeste Aziátiku.
Símbolu rekoñesimentu internasionál ba esforsu pás, rekonsiliasaun no dezenvolvimentu nasionál.
Iha kontestu ne’e PR manifesta intensaun hodi partisipa iha simeira istórika, nune’e sei dezloka husi Dili iha loron 24 Outubru no fila-fali mai iha territóriu nasionál iha 29 Outubru 2025.
Jornalista: Nelson de Sousa
Editór : Evaristo Soares Martins
