Autoridade Bobonaro husu SEKOMS loke sentru formasaun iha Balibó
BOBONARU, 15 Outubru 2025 (TATOLI) – Sekretáriu Autoridade Munisípiu Bobonaru ba Asuntu Sosiál no Organizasaun Komunitária, Júlio Carvalho Caerro, hato’o proposta verbalmente hodi husu ba Sekretaria Estadu Komunikasaun Sosiál (SEKOMS) atu loke sentru formasaun jornalizmu ba foinsa’e sira iha postu administrativu Balibó.
“Ha’u reprezenta Preziente Autoridade husu ba sua-eselénsia, karik bele tau fatin ba sentru formasaun jornalista iha ne’e nune’e sira bele kontinua obra jornalista na’in-lima ne’ebé mate iha ne’e, jornalista iha Timor tomak konsentra iha-ne’e tuir formasaun, ha’u esperu loron ida IX Governu sei realiza,” nia hateten iha intervensaun iha atividade lansamentu Rádiu Komunidade Fronteira Balibó Five Five, kuarta ne’e.
Sekretáriu Estadu Komunikasaun Sosiál, Expedito Loro Dias Ximenes, konsidera no sei aprezenta iha Konsellu Ministru.
“Ita sei haree took, maibé forsa maka’as liu, atubele deside realiza formasaun jornalizmu, governu durante ne’e serbisu hamutuk ho Konsellu Imprensa, ami ho Konsellu Imprensa sei diskute took oinsá formatu ida di’ak, atu sentru formasaun jornalista hanesan iha nasionál maibé harii iha Balibo, tanba agora iha Dili mós iha sentru formasaun jornalista barak, entaun ita sei ko’alia to’o konsellu imprensa to’o tempu ruma ita bele hari’i atubele fó omenajen ba jornalista na’in-lima ne’ebé fó sakrifísiu ba ita-nia luta ukun-an,” Expedito hakotu.
Daudaun ne’e Rádiu Komunidade Fronteira Balibo Five, iha jornalista na’in-ualu.
Notisía relevante: Governu lansa Rádiu Komunidade Fronteira Balibó
Jornalista: Sergio da Cruz
Editór: Evaristo Soares Martins
