DILI, 15 Outubru 2025 (TATOLI)—Konsellu Administrasaun Fundu Infraestrutura (KAFI) ezekuta ona orsamentu Fundu Infraestrutura 30% ka $93.698.228, iha trimestre datoluk (Janeiru-Setembru) tinan ne’e, husi totál alokasaun $312.203.618.
Prezidente KAFI, Gastão de Sousa esplika, Fundu Infraestrutura kompostu husi orsamentu husi Governu $261.913.128 no Fundu Empréstimu $50.290.490.
“Ita-nia ezekusaun fundu husi Governu $82.778.801 (31,6%) no Fundu Empréstimu ezekuta ona $10.919.426 (21,7%), nune’e totál ezekusaun parte rua ne’e hamutuk $93.698.228 totál (30%),” Prezidente KAFI informa ba Ajénsia TATOLI, iha ninia knaar fatin, Kuarta ne’e.
Nia esplika, razaun ezekusaun ki’ik no tarde oituan tanba projetu balun iha prosesu pagamentu iha Sekretariu Grade Projetu hamutuk millaun $10,3, ne’ebé seidauk atualiza, ida-ne’e mak pagamentu hotu aumenta ezekusaun sai millaun $103,9 ka 33,3%.
“Ita haree ba lala’ok prosesu infraestrutura sira iha tinan kotuk no agora ba ami-nia predisaun sei atinje 50 to’o 77%, buat hotu la’o di’ak hotu,” nia akresenta.
Notísia relevante : Proposta OJE 2026: Governu prevee millaun $301.7 iha Fundu Infraestrutura
Gastão de Sousa nota preokupasaun públiku ba ezekusaun ki’ik tanba projetu barak mak sei la’o hela iha prosesu Komisaun Nasionál Aprovizinamentu (CAN, sigla portugés).
“Projetu sira ne’ebé la’o hela iha CNA lubuk ida maibé projetu boot ne’e mak hanesan projetu Suai Supply Base no Auto Estrada, ida-ne’e mak asina kontratu ninia osan adiatamentu boot loos,” nia akresenta.
Nia dehan tan, projetu sira ne’ebé la’o iha CNA ne’e balu foin hetan empreza manán na’in no projetu sira ne’e o kustu millaun $5 ba leten, ne’ebé sei husu empreza hatama garantia ezekusaun foin mak asina kontratu.
Hafoin ne’e, sei haruka bá Tribunál Konta durante loron 20 hotu no karik aprova sai mak sei husu prosesu adiatamentu.
“Entaun sira ne’e hotu sai kauza ba ezekusaun ki’ik. Foin lalais KAFI aprova ona pagamentu projetu sira ne’ebé konkursu hamutuk 26 ne’ebé hanesan projetu infraestrutura hanesan bee-moos ba Manufahi millaun $15, Lautein millaun $17, estrada Letefoho Glenu millaun $40 resin, merkadu Lautein, Baukau no Ermera sira kauze millaun $10 hotu, inklui Ataúru foin lansa estrada, iha Vikeke Lakluta, estrada Manufahi Luak ba Betanu, Ponte Welolo no seluk tan. Sira ne’e hotu ita hein katak bele hasa’e ezekusaun,” nia katak.
Aleinde ne’e, ezekusaun ki’ik tanba KAFI seidauk ezekuta adiatamentu ba Aeroportu Internasionál Nicolau Lobato, Komoro ho valór millaun $15, ida-ne’e ezekuta bele dehan 5%.
Prezidente KAFI dehan, pagamentu ninia lala’ok normalmente iha Outubru klaran, novembru no Dezembru mak foin prosesa barak.
“Haree ba ezekusaun sira ki’ik nune’e Governu ida-ne’e foin halo alterasaun ba lei aprovizionamentu ne’ebé sei ezekuta iha tinan 2026, nune’e tinan oin KAFI foku ba ezekusaun,” nia katak.
Jornalista : Arminda Fonseca
Editora : Julia Chatarina
