DILI, 15 Outubru (2025)—Governu aprova ona projetu Rezolusaun Governu nian ne’ebé aprezenta mós husi Ministru Negósiu Estranjeiru no Kooperasaun (MNEK), Bendito Freitas, ne’ebé aprova akordu entre Governu Repúblika Demokrátika Timor-Leste no Governu Repúblika Populár Laos nian kona-ba troka direitu utilizasaun rai no edifísiu husi misaun diplomátika sira.
Tuir informasaun ne’ebe hakerek iha dokumentu ofisial katak antes ne’e akordu ne’e asina tiha ona iha Vietname, iha loron 08 fulan-Outobru tinan 2024, ho objetivu atu hametin relasaun amizade no kooperasaun entre nasaun rua.
Aleinde ne’e hodi garante kondisaun adekuadu ba funsionamentu husi sira ida-idak nia misaun diplomátiku sira no kooperasaun ne’e bazeia ba prinsípiu resiprosidade no tuir konvensaun viena nian kona-ba relasaun diplomátika no konsulár nian.
Tuir Akordu ne’ebé iha, Governu Laos fó ba Timor-Leste direitu atu utiliza rai pedasuk ida no edifísiu ne’ebé lokaliza iha Vientiane, enkuantu Governu Timor-Leste fó direitu ba Governu Laos atu utiliza rai pedasuk ida no edifísiu rua ne’ebé lokaliza iha Avenida de Portugal, iha Farol, Dili, ba objetivu ne’ebe hanesan.
Direitu utilizasaun nian sei válidu ba períodu tinan 70, ne’ebé bele estende liuhusi akordu mútuo, no imóveis ne’ebé iha kestaun sei hetan izensaun husi impostu no taxa, hanesan prevee ona iha padraun internasionál ne’ebé aplikavel no prinsípiu resiprosidade nian.
Akordu ne’e mós estabelese katak rai no edifísiu sira sei utiliza de’it ba objetivu diplomátiku, no labele transfere ka fó ba ema seluk bainhira laiha konsentimentu husi parte seluk.
Jornalista : Alexandra da Costa
Editór : Cancio Ximenes
