Governu aprova proposta ratifikasaun estatutu CPLP
DILI, 15 Outobru 2025 (TATOLI)—Governu liuhusi desizaun koletiva iha reuniaun Konsellu Ministru hodi aprova rezolusaun rua husi Parlamentu Nasionál Kona-ba ratifikasaun, estatutu Komunidade Ko’alia Lian Portugés (CPLP, sigla portuges) no ratifika akordu entre Repúblika Demokrátika Timor-Leste no Repúblika Angola kona-ba izensaun vistu ba titulár pasaporte diplomátiku no servisu nian.
Proposta rezolusaun rua husi Parlamentu Nasionál, ne’e aprezenta husi Ministru Negósiu Estranjeiru no Kooperasaun, Bendito dos Santos Freitas.
Tuir dokumentu ne’e Agência Tatoli asesu iha portal Governu kona-ba proposta rezolusaun dahuluk ne’e ho objetivu atu aprova, ba ratifikasaun, Estatutu Komunidade Ko’alia Lian Portugés (CPLP) nian, ne’ebé antes ne’e aprova ona iha Luanda, Angola, iha loron 27 Marsu 2023.
Nune’e alterasaun ba estatutu ne’e hetan aprovasaun husi Estadu-membru hotu-hotu durante reuniaun ordinária husi Konsellu Ministru CPLP nian neʼebé hala’o iha Luanda.
Aleinde ne’e, objetivu ratifikasaun ne’e atu inklui pilár haat husi atividade komunidade nia kooperasaun ekonómika no emprezariál, no proposta husi Prezidénsia Angolana neʼe aprova iha Simeira Xefe Estadu no Governu nian iha loron 17 fulan-Jullu tinan 2021, bainhira Luanda Angola mós asume kna’ar hanesan prezidénsia rotativa organizasaun ne’e nian.
Tanba ne’e, pilár foun ida-ne’e hamutuk ho tolu ne’ebé iha ona mak hanesan konsertasaun polítika no diplomátika, kooperasaun no promosaun lian no kultura portugés.
Estatutu CPLP estabelese enkuadramentu legál ne’ebé regula relasaun entre Estadu-membru sira, hodi define organizasaun nia objetivu, prinsípiu, estrutura organizasionál no sede no mós regra ne’ebé orienta ninia funsionamentu institusionál.
Enkuantu iha proposta rezolusaun daruak ho objetivu atu ratifika akordu entre Repúblika Demokrátika Timor-Leste no Repúblika Angola kona-ba izensaun vistu ba titulár pasaporte diplomátiku no servisu nian.
Akordu ida-ne’e reflete katak hakarak atu aprofunda liután relasaun ne’ebé iha no fasilita vizita ofisiál sira entre nasaun rua ne’e liuhusi rekoñesementu resíproku ba pasaporte diplomátiku ofisiál ka servisu nian no mós fó izensaun vistu ba nia titulár sira ba tama vizita no bele hela to’o loron 90.
Jornalista : Alexandra da Costa
Editór : Cancio Ximenes
