Janeiru-Outubru: ADN ezekuta OJE 2025 atinje ona 72%
DILI, 15 Outobru 2025 (TATOLI)—Diretór Interinu Ajénsia Dezenvolvimentu Nasionál (ADN), Januário M. Guterres, informa husi Janeiru to’o Outubru semana kotuk, AND ezekuta ona Orsamentu Jerál Estadu (OJE) 2025 atinje ona 72% bazeia ba programa prioridade prinsipál sira-ne’ebé estabelese ona iha ADN.
“ADN nia ezekusaun orsamentu iha tinan 2025 nian hahú husi fulan-Janeiru to’o semana kotuk atinje ona 72% ne’e atuál no fiar katak molok tama ba 2026 bele atinje to’o 90%,” Diretór Interinu ne’e relata ba Agência Tatoli iha nia kna’ar fatin, ohin.
Atinjimentu husi ezekusaun ne’e hotu fahe ba programa prinsipál ida kona-ba kontrolu kualidade projetu no inklui mós programa prioridade sira seluk hanesan formasaun no kapasitasaun rekursu umanu, dezenvolvimentu rurál no urbana, funsionamentu no dezenvolvimentu institusionál, programa kuidadu saúde primária no programa inkluzaun sosiál.
“Kona-ba programa saúde primária ne’e lolos ne’e ADN nia laiha, maibé tanba projetu PDIEM ne’e postu saúde balun ninia osan tau iha ADN, nune’e ami destaka mós programa ida-ne’e iha ami-nia proposta sira,” nia dehan.
Nia afirma, durante ezekusaun ne’e rasik ADN seidauk enfrenta osbtákulu ruma no orsamentu ne’ebé sira iha natoon ona ba sira hodi apoiu sira-nia servisu durante 2025.
“Iha Orsamentu Jerál Estadu (OJE) 2026, ami submete proposta adisionál ho montante millaun $4-resin, ne’ebé sei aloka persentajen boot-liu ba programa prioridade kontrolu kualidade projetu,” nia hateten.
Entretantu, Orsamentu Jerál Estadu (OJE) 2025 ne’ebé aloka ba Ajénsia Dezenvolvimentu Nasionál (ADN) ho totál $4,917,208.00, ne’ebé fahe ba kategoria ha’at (4) mak hanesan saláriu no vensimentu hamutuk $3,111,605, bens no servisu $926,060, kapitál menór $400,000 no Kñkapitál dezenvolvimentu $479,543.
Jornalista : Alexandra da Costa
Editór : Cancio Ximenes
