Jornalista na’in-lima mate iha Balibo sai fonte inspirasaun ba mundu jornalizmu
BOBONARU, 15 Outubru 2025 (TATOLI)–Jornalista Seniór Dezenvolvimentu Internasionál ABC, Matthew Carney, hato’o mensajen refletivu no signifikativu iha Aniversáriu Balibo Five ba da-50 ne’ebé hala’o iha Postu Administrativu Balibo, Munisípiu Bobonaru.
Notísia Relevante: Balibo Five, “Tim Susi” sunu jornalista na’in-lima to’o mutuk
Nia hateten, istória husi jornalista na’in-lima ne’ebé mate iha Balibo la’ós de’it istória maibé fonte inspirasaun rohan-laek ida ba mundu jornalizmu nian.
Nia temi naran sira Greg Shackleton, Gary Cunningham, Malcolm Rennie, Tony Stewart, no Brian Peters ho respeitu kle’an tanba sira-nia mate la’ós rohan maibé inísiu ba konxiénsia foun kona-ba signifikadu korajen no responsabilidade morál nu’udar jornalista.
“Sira mai iha ne’e ho objetivu ida de’it mak buka no deskobre lia-loos, ne’e mak lisaun boot-liu ba jornalista ida-idak. Misaun ida-ne’ebé tenki proteje no hafolin. Sira hamriik aas ho korajen no konviksaun. Sira merese atu hanoin sira ohin no iha future,” Jornalista Senior ABC ne’e hateten iha nia diskursu ho tema “Papél Jornalista sira nian iha Estadu Demokrátiku no Autoritáriu sira, no iha Era Intelijénsia Artifisiál (IA) nian”, iha Balibo, ohin.
Nia hanoin hikas gravasaun finál Greg Shackleton nian, ko’alia ba kámara la dook husi fatin ne’ebé komemorasaun ne’e hala’o. Ba nia, Shackleton nia liafuan ne’ebé deskreve povu Timor nia sofrimentu iha tempu ne’ebá relevante nafatin to’o ohin loron.
Nu’udar jornalista ne’ebé serbisu ona durante dékada tolu nu’udar korespondente iha zona konflitu oioin hanesan iha Papua Osidentál, Sri Lanka, Myanmar, no Koreia-Norte, to’o Irake, Iraun, Síria, Gaza, no Áfrika, nia admite katak espíritu husi Balibo Five sai hanesan lembransa konstante ida iha nia kareira tomak.
“Iha ha’u-nia momentu nakukun liu, bainhira mosu tauk no inserteza, dala barak ha’u hanoin kona-ba Balibo Five. Sira hanesan konfortu ida mai ha’u. Hanoin hikas sira fó konfiansa mai ha’u katak ha’u halo buat ruma ne’ebé signifikativu no ho objetivu. Mensajen husi Balibo Five nafatin ho ha’u no simples maibé maka’as hodi fó sasin nafatin ba lia-loos,” nia dehan.
Notísia Relevante: Claire: Balibo Five fó hanoin kona-ba importánsia ba seguransa jornalista
Jornalista : Hortencio Sanchez
Editór : Cancio Ximenes
