ERMERA, 15 Outubru 2025 (TATOLI)—Administradór Postu Administrativu Hatolia A, Munisípiu Ermera, Bonifacio da Silva informa suku haat iha Postu Hatolia A seidauk asesu ba estrada.
“Hatulia A kompostu husi suku sia (9) maibé iha Suku Koilate-Leotelo, Samara, Asuilau no Ailelo, ne’e ita-nia komunidade seidauk asesu ba estrada. Tanba iha tempu udan rai mean namdoras difikulta transporte hotu labele asesu bá-mai ho di’ak,” Bonifacio ba jornalista sira hafoin partisipa komemorasaun Loron Mudiál Feto Rurál iha Suku Leimea Kraik, Postu Administrativu Hatolia B, Kuarta ne’e.
Autoridade ne’e hatutan, ho problema ne’ebe komunidade iha suku referidu enfrenta labele lori produtu lokál ba vila munisipál nian tanba komunidade ho transporte tenke atravesa mota tolu hosi Postu Hatolia A.
Bonifacio informa suku sira seluk maioria komunidade asesu ona ba estrada tanba Programa Nasionál Dezenvolvimentu Suku (PNDS) implementa projetu konstrusaun estrada iha suku bá aldeia fui (cor) ona simente.
Enkuantu, estrada husi Postu Administrativu Glenu to’o Postu Hatolia A kondisaun aat no kuak barak inklui ponte tohar seidauk halo manutensaun nune’e iha tempu udan difikulta transporte asesu bá-mai ho di’ak hodi tula komunidade nia produtu ba fa’an iha merkadu.
“Maibé hanesan administradór nafatin esforsu servisu ho liña ministeriál sira hotu nune’e bele responde fazeadamente iha mandatu Governu ida-ne’e nian atu nune’e komunidade sira bele asesu ba estrada,” Banifacio tenik.
Iha fatin hanesan, Prezidente Komisaun F iha Parlamentu Nasionál ne’ebé trata Asuntu Seguransa Sosiál, Saúde no Igualdade, Maria Gorumali hateten maski Suku Leimea-Kraik iha produtu lokál barak atu ba fa’an iha Postu Hatulia, maibé iha difikuldade boot ida mak estrada, no kuandu to’o tempu udan difikulta nafatin sasán sira-ne’e para to’o iha Hatulia tanba tenke ultrapasa mota.
“Ne’ebé, ida-ne’e hanesan notísia ida ba ami, depoiz ami sei foti kestaun ne’e iha Parlamentu ne’ebá,” Prezidente Komisaun F ne’e tenik.
Postu Hatolia A iha suku ualu hanesan Asulau, Ailelo, Koliate-Leotelo, Hatolia Vila, Leimea-Kraik, Leimea-Sorinbalu, Manusae no Samara no mós iha aldeia hamutuk 33 ho nia populasaun hamutuk 26.000. Enkuantu, populasaun Munisípiu Ermera hamutuk 137.750
Aldeia neen uza solár panél iha kalan
Entretantu, Administradór Postu Administrativu Hatolia A, Bonifacio da Silva informa, aleinde enfrenta difikuldade ba estrada, Munisípiu Ermera, aldeia neen (6) iha Postu Hatolia A mós seidauk asesu ba liña eletrisidade no sira uza de’it solár panél iha tempu kalan.
“Falta liña eletrisidade. Iha tempu kalan komunidade uza de’it solár panél hodi fó naroman ba sira hodi han kalan no mós estuda matéria eskola nian,” Administradór Bonifacio da Silva hateten ba jornalista sira.
Autoridade ne’e dehan komunidade hasai osan rasik sosa solár panél iha loja Xineza sira mak uza hodi fó naroman ba sira iha tempu kalan.
Administradór ne’e esplika, aldeia neen ne’ebé hasoru difikuldade ba eletrisidade mak hanesan Aldeia Lakeama iha Suku Leimea-Kraik, Aldeia Santa Krús no Betupuu iha Suku Ailelo no aldeia tolu seluk iha Suku Manusae Koilate no Asulau Saré.
Iha sorin seluk, Xefe Suku Leimea-Kraik, Patriciano de Araújo, haktuir iha Suku Leimea-Kraik la’ós hasoru problema eletrisidade de’it maibé problema boot mak ponte no estrada ne’ebé difikulta tebes ba komunidade hodi asesu ba merkadu.
Jornalista: Osória Marques
Editór: Xisto Freitas da Piedade
