MAE organiza semináriu kona-bá desentralizasaun iha Kovalima
KOVALIMA, 15 Outubru 2025 ( TATOLI) – Ministériu Administrasaun Estatál (MAE) liuhosi Diretór Jerál Desentralizasaun no Podér Lokál, António Guterres, organiza semináriu kona-bá desentralizasaun ba autoridade sira iha munisípiu Kovalima.
Semináriu ho tema “dalan ba podér lokál “ ho nia sub tema “hametin Governasaun lokál ba dezenvolvimentu inkluzaun no sustentável hodi hakbesik Governasaun.”
Objetivu husi semináriu ne’e, dirijente husi Kovalima idak-idak atu partilla sira-nia progresu servisu no dezafiu henesan kona-bá setór edukasaun haree ba pré-eskolár, ensinu báziku no programa merende eskolár no seluk tán.
“Atividade semináriu ne’e hala’o durante loron rua ne’ebé hahú ohin no aban ha’u-nia diretór maka sei akompaña no sei aprezenta relatóriu atu entrega ba Ministru Administrasaun Estal no kontinua aprezenta ba Primeiru Ministru,” Diretór Jerál Desentralizasaun no Governasaun Lokál, António Guterres, ko’alia Salaun AMC.
Hafoin dirijente sira aprezenta idak-idak nia servisu relatóriu, iha tinan oin ho aprezentasaun ne’ebé maka aprezenta kona-bá progresu servisu no dezáfiu sira no oinsá fó solusaun.
Nia dehan, munisípiu seidauk implementa podér lokál, maibé autoridade munisipál ho autonomia administrativa finanseira no patromóniu rasik, oinsá maka bele minimiza dezáfiu iha polítika hein rezultadu avaliasaun iha 2026, hasoru dezafiu finanseira orsamentu ne’ebé maka alokadu nia ezekuasaun no hodi finansia ba, programa, sub-programa no atividade sira.
Prezidente Autoridade Munisípiu Kovalima, Miguel Armanda Cardoso, konsidera atividade ida-ne’e imporante tanba durante ne’e iha munisípiu hein hela.
“Atividade semináriu ida-ne’e atu partilla informasaun, kona-bá desentralizasaun, tanba ida-ne’e importante ba ita ne’ebé maka durante ita hein hela,” nia katak.
Autoridade Kovalima durante ne’e hala’o nia kna’ar bazeia ba kompeténsia hanesan, administrasaun, finansa, patromóniu lojístika maibé podér polítika seidauk fó.
Ho atividade semináriu ida-ne’e Sekretáriu Munisipàl na’in tolu aprezenta progresu servisu durante la’o no idak-idak nia kompeténsia iha Kovalima no mós diretór servisu munisipál sira.
Prezidente Autoridade Munisípiu Kovalima iha nia sekretáriu munisipál na’in tolu maka hanesan Sekretáriu Munisipál Administrasaun Finansa, Sekretáriu Munisipál Planeamentu Investimentu no Dezenvolvimentu Integradu no Sekretáriu Munisipál Asuntu Sosiál no Organizasaun hamutuk ho nia diretór servisu munisipál 19 no diretór delegasaun territorial sira.
Jornalista: Celestina Teles
Editór: Evaristo Soares Martins
