SEKOMS-ARKTL promove dijitalizasaun rádiu komunidade iha komemorasaun Balibo Five
BOBONARU, 15 Outubru 2025 (TATOLI)–Sekretária Estadu Komunikasaun Sosiál (SEKOMS) no Asosiasaun Rádiu Komunidade Timor-Leste (ARKTL) hala’o programa interkámbiu ba jornalista, estudante, no edukadór komunikasaun sosiál hodi komemora aniversáriu Balibo Five ba da-50 no loron liberdade imprensa ba da-tolu (3).
Programa ne’e fornese plataforma hodi troka esperiénsia no fó formasaun téknika ba jestór rádiu komunitária (Rakom) sira iha Timor-Leste, enkuantu hametin mós kolaborasaun entre SEKOMS no ARKTL hodi promove dijitalizasaun mídia komunitária.
Sekretáriu Estadu Komunikasaun Sosiál, Expedito Loro Ximenes, hateten programa ne’e ho objetivu atu haforsa kapasidade rekursu umanu rádiu komunidade no garante sustentabilidade informasaun iha nível komunidade.
“Liuhusi programa interkámbiu ne’e, jestór rádiu komuniade sira bele introdús sira-nia atividade husi munisípiu ida ba munisípiu seluk, aprende ba malu no fahe esperiénsia,” Expedito hateten iha interkambiu ne’ebé hala’o iha Edifísiu Parókia Balibo, kuarta ne’e.
Rádiu komunidade hanesan vanguarda divulgasaun informasaun nian no kria husi komunidade rasik, no agora daudaun iha ona rádiu komunidade hamutuk 21 iha nasaun tomak.
Governu kontinua fornese matadalan sira transmisaun nian, inklui iha tétun no lian materna sira hanesan Fataluku, Galolen, no seluk tan.
Nia dehan, importánsia husi kobertura bazeia ba komunidade ne’ebé destaka agrikultura, pekuária no atividade sosiál sira.
Nia hatutan, durante enkontru ne’e, jornalista no jestór rádiu komunidade sira mós aprezenta proposta Rakom balun ne’ebé foka liu ba aprovizionamentu transmisaun, ekipamentu tékniku, formasaun rekursu umanu no fasilidade eskritóriu.
SEKOMS liuhusi Diresaun Nasionál Dezenvolvimentu Mídia (DNDM) sei kontinua kolabora ho ARKTL hodi rezolve dezafiu oioin ne’ebé Rakom hasoru.
Aleinde ne’e, tuir Orsamentu Estadu 2025 (APBN), transferénsia públika ba Rakom (Ajénsia Komunikasaun Komunitária) hamutuk entre $6.000 to’o $9.000 distribui bazeia ba sira-nia proposta no dezempeñu.
“Ami mós sei halo auditoria interna sira ba Rakom sira hotu hodi asegura katak fundu públiku sira uza ho efetivu. Karik sira-nia kobertura iha kualidade aas, sira-nia orsamentu sei aumenta,” nia hateten.
Prezidente Asosiasaun Rádiu Komunidade Timor-Leste (ARKTL), Prezadu Ximenes, esplika katak atividade ne’e nu’udar inisiativa jestór Rakom nian hodi hametin rede komunikasaun komunidade iha rejiaun tomak.
“Diskusaun inisiál mosu husi nesesidade atu fahe ideia sira no hato’o aspirasaun sira ba SEKOMS. Liuhusi atividade ne’e, ami fó formasaun ba jornalista sira no jestór sira Rakom nian iha utilizasaun rádiu streaming nian no hametin kna’ar feto sira-nian iha lideransa Rakom nian,” Prezadu esplika.
Nia hatutan, ARKTL hamutuk ho SEKOMS dezenvolve mós sistema dijitál ida ho naran Agregat, ne’ebé sei halo agregasaun ba konteúdu notísia, foto, no relatóriu sira husi Rakom sira iha nasaun laran tomak.
“Sistema ida-ne’e la’ós kona-ba fa’an notísia maibé kona-ba hametin rede informasaun nasionál no hadi’a kualidade jornalista Rakom nian. Ami hakarak Rakom iha karáter no konteúdu lokál ne’ebé forte,” nia hateten.
Nia fiar katak dijitalizasaun loke oportunidade signifikante ba Rakom atu alkansa sidadaun timoroan sira tantu iha rai-laran no mós iha nivel internasionál.
“Rakom balun uza daudaun ona plataforma sira hanesan TikTok no bele atinji telespetadór 1.800 to’o 2.000. Ida-ne’e hatudu potensiál boot tebes hosi mídia dijitál. Karik SEKOMS bele kolabora ho Google ba monetizasaun iha futuru, Rakom mós sei hetan benefísiu”, Prezadu hatete.
Interkámbiu ne’e hetan partisipasaun husi partisipante hamutuk na’in-57, inklui jornalista, estudante komunikasaun sosiál, profesór no jestór Rakom husi rejiaun oioin.
Jornalista : Hortencio Sanchez
Editór : Cancio Ximenes
