Autoridade Fatumea no Maukatar husu MS koloka médiku sira ho balansu
KOVALIMA, 16 Outubru 2025 ( TATOLI)– Administradór Postu Administrativu Fatumea, Sejar Madeira, husu ba Servisu Saúde Kovalima halo kolokasaun médiku tenke ho balansu tanba iha sentru saude Fatumea médiku na’in-ida de’it, nune’e defisil halo halo atendimentu.
“Ha’u husu atu halo balansu kolokasaun rekursu umanu, tanba tuir rejimentu enfermeiru-sira labele halo konsulta ba pasiente-sira tenke médiku, maibe iha sentru saúde Fatumea na’in-ida de’it la sufisente atu halo atendimentu”, Autoridade Fatumea, Sejar Madeira, hato’o iha salaun AMC
Autoridade Postu ne’e hato’o kestaun tanba realidade hatudu katak durante tinan-lima ona kolokasaun médiku na’in-ida de’it maka halo atendimentu ba komunidade sira iha Fatumea, nune’e la sufisente tanba ne’e presiza atu aumenta médiku balun.
Hatan ba kestaun ne’e, Diretór Servisu Saúde Munisípiu Kovalima, Domingos Sequiera, klarifika katak tuir Planu Estratéjia Nasionál Ministériu Saúde katak iha postu saúde koloka pesoál saúde na’in-lima maka hanesan,Médiku ida,Parteira na’in-ida,enfermeiru na’in-ida,saúde públiku na’in-ida ho farmasista ida.
“ Bazeia ba ita-nia mapamentu postu saúde hotu iha ona médiku ho enfermeiru, maske sei menus, nune’e maka iha tinan kotuk ita loke konkursu públiku atu aumenta ema na’in-20, maibé sidadaun na’in-tolu maka submete dokumentu”, nia afirma.
Tuir dadus pesoál saúde ne’ebé maka presta servisu iha Sentru Saúde Komunitária (SSK) Fatumea hamutuk 26, kompostu funsionáriu permanente hamutuk 15 no kontratu na’in-13.
Autoridade Maukatar kestiona pontualidade pesosál saúde
Entretantu, Lideransa komunitáriu husi suku Belekasak, Postu Administrativu Maukatar, kestiona prestasaun ka pontualidade pesoál saúde iha sentru saúde sira iha Maukatar.
“Ami kestiona pontualidade servisu pesoál saúde iha sentru saúde sira tanba ami halo vizita direta hodi observa katak lolos oras servisu hahú tuku 8:00 dader maibé realidade pesoál saúde sira presta servisu hahú iha tuku 9:00 dader”, Xefe Suku Belekasak, Leonito Gusmão, hato’o preokupasaun ne’e iha salaun AMC.
“Durante ne’e ami asina hela relatóriu ho obrigatóriu, maibé ba oin bainhira pesoál saúde sira presta servisu la tuir povu nia hakarak, ami sei la asina sira-nia relatóriu servisu ”, nia dehan.
Hatan ba kestaun ne’e, Diretór Servisu Munisípiu Saúde Kovalima,Domingos Sequeira, konsidera preokupasaun husi xefe suku Belekasak importante, nune’e bele partilla informasaun ba malu hodi halo kontrolu ho di’ak liutan.
“Dirijente ho autoridade postu no lideransa komunitária ita fahe ona tarefa servisu, nune’e xefe suku nia kompeténsia kada fulan asina pesoál saúde sira-nia relatóriu mensál nune’e husi postu submete mai, nune’e presiza hamutuk atu hadi’ak di’ak liutan asuntu hirak ne’e”, nia afirma.
Tuir dadus pesoál saúde ne’ebé maka presta servisu iha sentru saúde no postu saúde sira hamutuk 350. Husi númeru ne’e, sira ne’ebé maka servisu iha servisu saúde Kovalima hamutuk 54,sentru Saúde Komunitariu (SSK) Fatululik,26,SSK Fatumea 26,SSK Fohorem 39,SSK Maukatar 47,SSK Suai 68,SSK Tilomar 41 no SSK Zumalai 47.
Jornalista:Celestina Teles
Editór:Florencio Miransa Ximenes
