DILI, 16 Outubru 2025 (TATOLI)—Arsebispu Arkidioseze Metropolitana Dili, Dom. Virgílio Kardeal do Carmo da Silva, SDB, konsidera selebrasaun trájedia Balibo Five ba da-50 no loron Liberdade imprensa ba da-tolu ne’e, ajuda tatoli istória rezisténsia husi liberdade imprensa ne’ebé akontese iha tempu pasadu ba jerasaun foun sira iha Timor-Leste.
Notísia Relevante: Balibo Five, “Tim Susi” sunu jornalista na’in-lima to’o mutuk
Arsebispu Arkiodioseze Metropolitana Dili, Dom. Virgílio Cardeal do Carmo da Silva, hateten loron trájedia Balibo Five nu’udar loron ne’ebé importante tebes ba ema hotu katak iha tempu pasadu ne’ebé nakonu ho terus, maibé liuhusi jornalista nia papél bele lori informasaun kona-ba saida mak kontese iha pasadu ba mundu tomak hodi hatene.
“Hakarak hato’o parabens ba imprensa tomak ne’ebé eziste iha Timor-Leste, ne’ebé la kolen servisu hodi transmite informasaun ba públiku. Ne’eduni, ho selebrasaun iha loron liberdade imprensa ne’e kontinua fó informasaun ne’ebé mak loos, maske lei fó dalan ba ema hotu mídia sira hodi ezerse ida-idak nia funsaun,” Arsebispu hato’o ba jornalista sira iha edifísiu IGEADI, Hera, ohin.
Loron Balibo Five ne’e la’ós atu selebra de’it maibé hanorin timoroan sira atu koñese istória Timor nian no tanbasá mak bele mosu trájedia ida-ne’e, tanba istória sira-ne’e sempre iha lisaun barak ne’ebé bele hanorin jerasaun foun sira atu aprende.
“Agradese mós ba Governu ne’ebé nafatin proteje mídia sira hodi hala’o sira-nia papél hanesan fonte informasaun, tanba iha nasaun barak mak sei limita liberdade imprensa ba jornalista sira,” nia dehan.
Tanba ne’e, nia husu jornalista sira atu esplora nafatin ida-idak ninia nia responsabilidade ne’ebé hetan konfiansa husi povu no nasaun, tanba ema hotu presiza asesu informasaun ne’ebé akontese iha Timor-Leste.
Notísia Relevante: Xanana Gusmão: Balibo Five fó hanoin lia-loos labele nonook
Jornalista : Alexandra da Costa
Editór : Cancio Ximenes
