DILI, 16 Outubru 2025 (TATOLI)-Arsebispu Arkidioseze Meteopolitana Dili, Dom. Virgílio Cardeal do Carmo da Silva, husu ba Governu atu haforsa lei fundamentuál ida hodi halo kontrolu ba jogu online sira atu labele fó impaktu ba joven sira iha Timor-Leste.
Notísia Relevante: Fulan ne’e, MTKI-PNTL asina akordu atua jogu ilegál
“Ha’u hanoin kazu jogu online ne’ebé akontese iha mundu inklui iha Timor iha ninia konsekuénsia sira. Ne’eduni, hanesan nasaun ida, iha ninia lei no orden,” Arsebispu informa ba jornalista sira iha ámbitu inaugurasaun gruta IJEADI iha Hera, kinta ne’e.
Governu tenke foti medida ne’ebé aprofunda, nune’e hodi garante seguransa nasaun nian liuliu tenke haforsa lei tanba lei mak bele kontrola buat sira-ne’e hotu.
Tanba ne’e, nia husu atu nai-ulun (governante) ne’ebé iha kompeténsia ka responsável ba aktu krime ida-ne’e atu ezerse ninia kna’ar nu’udar autoridade hodi kontrola ho másimu, nune’e labele husik liu asaun negativu sira tama iha ita-nia rain.
“Tamba ita hatene katak jogu ida-ne’e sei fó impaktu negativu ba ita-nia rai liuliu ba joven sira, tanba jogu ne’e envolve ho atividade ne’ebé negativu bele destroi ita-nia rain,” nia hateten.
Jornalista : Alexandra da Costa
Editór : Cancio Ximenes
