DILI, 16 Outubru 2025 (TATOLI)—Arsebispu Arkidioseze Metropolitana Dili, Dom Virgílio Kardeál do Carmo da Silva, SDB, halo inagurasaun no fó bensa ba konstrusaun gruta mahein ila Na’in Feto Aitara hodi sai salva guarda no fó protesaun ba servisu Institutu Jestaun Ekipamentu no Apoiu Dezenvolvimentu Infraestrutura (IGEADE, sigla portugés) hamutuk ho ne’ebé konsidera nakonu ho risku ba asidente.
Arsebispu Arkidioseze Metropolitana Dili, Dom Virgílio Kardeál do Carmo da Silva, SDB, hateten harii gruta Na’in Feto Aitara ne’e ho objetivu ida hakarak atu lori prezensa Maromak nian besik liután iha sira-nia servisu fatin.
Tanba, nia dehan, instituisaun IGEADE ida-ne’e nia papél ne’e boot tebes tanba lori ekipamentu oezadu lori la’o haleu Timor laran tomak, maske dalabarak servisu iha risku nia laran.
“Nu’udar fiar-na’in sira sempre tau konfiansa ba Maromak, entaun harii gruta ida-ne’e husu mós Nai Maromak liuhusi intersesaun harohan da’et Na’in Feto Aitara nian, atu proteje traballadór sira hotu ne’ebé servisu iha ne’e,” Dom Virgílio Kardeál do Carmo da Silva, SDB, hateten ba jornalista iha Hera, ohin.
Funsionáriu IGEADE sira sei la la’o mesak maibé hetan nafatin protesaun husi Na’in Feto Aitara nia akompañamentu ba sira-nia servisu ne’ebé nakonu ho risku oioin.
Institutu Jestaun Ekipamentus (IJEADI) hakarak foti ilas Na’in Feto Aitara sai sira-nia mahein tanba iha mandatu Governu anteriór ne’ebé lidera husi atuál Ministru Planeamentu no Investimentu Estrátejiku (MPIE), Gastão Sousa, sempre simu imajen Na’in Feto Aitarak bainhira sira ajuda normaliza amu-lulik sira no komunidade ne’ebé hetan dezastre naturál ba sira-nia hela fatin.
Prezidente Institutu Jestaun Ekipamentu no Apoiu Dezenvolvimentu Infraestrutura (IGEADE, sigla portugés), Ana Paula da Cruz, hateten IGEADE ne’e servisu ne’ebé liga liu ho ekipamentu mákina boot sira no iha risku ne’ebé ‘booy, nune’e presiza iha fiar ne’ebé metin ba Maromak tanba ne’e desizaun konsellu ida katak tenke konstrui gruta ida hodi sai protetór ba servisu IGEADE nian.
“Kuaze traballadór sira-ne’e iha tempu barak liu halo servisu sira no laiha ona tempu atu ba misa, tanba ita haree dalaruma udan halo rai monu taka komunidade rikuso’in ruma, ita tenke ba normaliza lalais. Entaun, ita harii gruta ne’e atu hametin nafatin sira-nia fiar,” Prezidente IGEADE ne’e informa ba jornalista sira iha ninia kna’ar fatin, Hera, ohin.
Nia hatutan, ida-ne’e mós hanesan kontribuisaun husi Governu da-sia nian tanba bainhira sira-nia mandate ramata ona, maibé sira mós bele rai hela prezervasaun sagradu ida ba instituisaun ida-ne’e atu nafatin hetan protesaun husi Maromak.
Entretantu, antes atu halo inaugurasaun ba gruta ilas Na’in Feto Aitara ne’e, iha mós selebra misa agradesementu no mós asina plaka husi Amu Kardeal rasik, partisipante sira kompostu husi Ministériu Obra Públika (MOP), Sekretáriu Estadu Asuntu Toponímia no Organizasaun Urbana (SEATOU), traballadór husi IGEADE no mós komunidade iha Hera.
Jornalista : Alexandra da Costa
Editór : Cancio Ximenes
