MS klarifika ai-moruk ba kankru nian estoke menus
DILI, 16 Outubru 2025 (TATOLI)—Ministra Saúde, Elia dos Reis Amaral, klarifika katak ai-moruk ba kankru nian estoke menus la maiória stock out.
Ministra Saúde, Elia Dos Reis Amaral, hateten ai-moruk kankru ba pasiente ho tipu Kryxana Femara nop Infusaun Zometa ba pasiente na’in-haat no mós ai-moruk kankru sira seluk ba pasiente na’in-rua seluk la’ós mamuk maibé menus de’it.
“Ha’u hare’e la’ós hotu-hotu stock out lae, ita-boot sira hotu mídia mós hakerek titulu jornal ne’e halo klarifika antes fó sai ba públiku. Se ida-ne’e ita-boot sira espalla ba públiku ne’e mós la di’ak. Ita-boot sira konfirma tiha lai loos ka lae, pois mak hatun notisia tanba povu fiar ita-boot sira. Ita-boot sira presiza informasaun ne’ebé loos, atu nune’e karik laloos, ami hadi’a buat ne’ebé laloos, ita-boot sira labele aumenta,” Elia dehan ba jornalista sira iha HNGV, ohin.
Iha fatin hanesan, Diretora Nasionál Apoiu Servisu Hospitalar, Ministériu Saúde, Maria Santina de Jesus Gomes, informa parte DNASH hato’o ona karta pedidu ba iha Institutu Nasionál Farmásia Produtu no Médikamentu, atu responde ba preokupasaun pasiente sira-nian.
“Estoke limitadu maibé ami hamutuk ho INFPM halo hela prosesu kompra ai-moruk ba pasiente kanrku na’in-neen nian,” Maria Santina de Jesus Gomes hateten.
Antes ne’e, Institutu Nasionál Farmásia Produtu no Médikamentu (INFPM), daudaun ne’e estoke ba ai-moruk kankru limitadu, atu fornese ba pasiente moras kankru sira-ne’ebé presiza, nune’e pasiente balun kuaze fulan neen ona la konsumu ai-moruk ho tipu kryxana femara no infusaun zometa.
Durante ne’e, Diresaun Nasionál Apoiu Servisu Hospitalar, Ministériu Saúde (DNASH-MS), mak fasilita ai-moruk ba pasiente moras kankru sira, ne’ebé ba-mai halo tratamentu iha estranjeiru.
Jornalista : Felicidade Ximenes
Editór : Cancio Ximenes
