DILI, 17 Outubru 2025 (TATOLI)—Papa Leão XIV sei kanoniza Beata Irmán Maria Troncatti husi Institutu Filhas de Maria Auxiliadora (FMA) sai santa iha 19 Outubru 2025 iha Prasa São Pedro Italia.
Antes ne’e, iha tinan 2024, Papa Francisco deklara ona Beata Irmán Maria Troncatti sai santa maibé tanba Papa Francisco mate uluk, entaun iha fulan-Juñu 2025 ne’e mak Papa Leão XIV halo fali konsistoru hodi deside data ba kanonizasaun iha 19 Outubeu 2025 (hanesan loron Maria Troncatti hala’o nia misonária husi Italia ba Ekuador.
Ho kanonizasaun ida-ne’e, istória sei haktuir katak Beata Irmán Maria Troncatti sai santa iha loron 19 Outubro 2025 ne’e, sai hanesan irmán husi kongregasaun Filhas de Maria Auxilaidora (FMA) FMA daruak ne’ebé sai SANTA hafoin Madre Maria Mazzarello.
Beata Irmán Maria Troncatti ne’ebé koñesida ho inan Misonária Artezana Pás no Rekonsiliasaun ne’e, hala’o ninia misonária iha Ekuador iha loron 09 Novembru 1922, tuir lema ne’ebé nia hakerek iha ninia surat ida iha 1939 nune’e; “Loro-loron ha’u haksolok ho ha’u-nia voksaun relijioza misionária”.
Beata Irmán Maria Troncatti iha maun-alin hamutuk 14 no nia mak hanesan oan-feto daruak. Nia moris iha Brescia, Corteno Golgi, iha 16 Fevereiru 1883, husi inan no aman, Maria Rodondi no Giacomo Troncatti. Beata Irmán Maria Troncatti mate iha 25 Agostu 1969 tanba insidente ho aviaun.
Papa Francisco deklara Beata Irmán Maria Troncatti atu sai santa, tanba Irmán Maria Troncatti halo milagre ba mane ida naran Juwá Juank Bosco Kankua, moris iha 1975 iha Tuutin’entsa, iha provínsia Morona Santiago, kaben ho Natalina no aman ba oan na’in neen, bainhira hetan asidente.
Milagre ne’e akontese iha tinan 2015. Iha biban ne’e, Juwá Juank Bosco Kankua hetan asidente grave ida no hetan diagnóstiku ho trauma ulun nakloke ho tesidu kakutak nian ne’ebé nakloke. Ninia família, Irmán Saleziana sira, no ema seluk entrega nia ba Beata Maria Troncatti, iha-ne’ebé nia hetan kura ida-ne’ebé inesplikavel ba siénsia médika.
Juwá Juank Bosco Kankua haktuir, iha 02 Fevereiru 2015, bainhira nia afina hela mákina sira iha ai-laran Amazónia nian, nia hetan baku maka’as iha nia kakutak nia sorin loos husi fatuk pedasuk boot ida, hodi hamosu fratura kle’an no harahun nia kakutak sorin. Ninia família no komunidade, maske situasaun desesperada, laran metin kedas nia ba misionária Irmán Maria Troncatti ninia intersesaun.
Iha kuarta (15 Outubru 2025) dadeersan, Juwa Juank Kankua Bosco, ne’ebé hetan milagre liuhusi intersesaun Irmán Maria Troncatti nian, husi Ekuadór to’o ona iha Roma, iha Kaza Jerál Institutu FMA nian, atu tuir Kanonizasaun Irmán Maria Troncatti nian, iha 19 Outubru iha Prasa São Pedro Italia.
Sira-ne’ebe viajen hamutuk ho Juwa Juank Kankua Bosco mak nia feen Natalina, nia oan-mane, nia kuñada, ne’ebé tau imajen Irmán Troncatti nian iha ema moras nia kama, no Filhas de Maria Auxiliadora balun husi Provínsia Sagrado Coração (ECU)—inklui Provinsiál, Irmán Lupe Erazo, Irmán Cruz María Piña Peláez, Provínsial anteriór, ne’ebe tuir kazu no fó asisténsia nesesáriu, no Irmán Elena Tinitana, membru Tribunál Kanóniku ne’ebé tau matan ba prosesu kanonizasaun. Sira simu ho ksolok husi Madre Chiara Cazzuola no Konselleira Jerál sira, Diretora, Vigária, no FMA balun husi casa Jerál.
Irmán Maria Troncatti halo Milagre
Atu hatene sá milagre mak Irmán Maria Troncatti halo hodi salva Juwá Juank Bosco Kankua nia moris iha perigu ida-nia laran, Agência TATOLI haktuir istória ne’ebé sita husi portál https://www.fmatin.org/ husi kongregasaun Filhas de Maria Auxiliadora (FMA) iha Timor-Leste, liuhusi husu no hatán;
Ita-boot bele konta mai ami saida loos mak akontese bainhira irmán Maria mosu ba ita-boot iha mehi?
Bainhira ha’u hetan asidente, ha’u haree nia. Nia la mai iha mehi; nia mai rasik bainhira ha’u hadeer. Nia tama, loke odamatan, no la’o neineik ba fatin ne’ebé ha’u toba hela. Nia lori hela nia pasta no tuur iha ha’u nia kama.
Nia dehan mai ha’u, ‘Ha’u nia oan, saida mak akontese ba ó?’ Nia husu pergunta ida-ne’e mai ha’u, maibé iha momentu ne’ebá ha’u labele ko’alia ka la’o. Maibé, ha’u sente katak ha’u bele ko’alia ho nia, no ha’u hateten ba nia katak ha’u halimar hela no ha’u nia ain-tuur mak naksalak. Nia dehan mai ha’u, ‘Ha’u sei kura ó. Nia loke nia pasta, hasai pomada ida, no hahú kose ka komu (masajen) ha’u nia ain-tuur. Depois ha’u husu nia atu masajen ha’u nia kabas, mós, maibé nia dehan mai ha’u atu hateten ba ha’u-nia feen atu halo rasik.
Depois, nia hateke mai ha’u no dehan, ‘Se ita-boot iha kulit tarutu nian, ha’u sei tau ida-ne’e iha ó-nia ulun ne’ebe kuak. Depois nia tuur fali, loke nia liman, no kona ha’u-nia ibun ho torneira ida, hodi dehan, ‘Ó sei ko’alia lalais.’ Depois ida-ne’e, ha’u iha sentimentu katak nia hakarak sai. Ha’u hakarak hakuak nia, maibé ha’u labele: nia lakon, hanesan klamar ida, nia lakon.
Husi tempu neʼebá, haʼu-nia moris troka kompletamente. Ha’u sente kontente tanba iha estadu ne’ebé ha’u iha uluk, labele ko’alia ka la’o, ha’u-nia fuan sai fraku.
Hafoin ida-ne’e, ha’u hahú koko atu la’o: ha’u konsege hasa’e ha’u-nia ain sira mesak, lahó ema ida nia tulun. Depois, ha’u koko atu ko’alia; liafuan dahuluk ne’ebé ha’u konsege pronúnsia maka ha’u nia feen nia naran. Primeiru, ha’u koko, depois ha’u-nia lian sai, no ha’u bolu nia naran, ‘Natalina’. Foufoun, nia la rona ha’u, maibé dala daruak nia rona ha’u no hamriik, ho hakfodak. Nia hakuak ha’u no husu saida mak akontese, hanoin katak ha’u hakarak dehan adeus antes nia mate. Iha momentu ne’ebá, ha’u la hateten buat ida ba nia. Ami reza rozáriu, no nia fila fali ba toba.
Loron tuir mai, haʼu koko fali atu haree se haʼu bele koʼalia ka lae. Ha’u bolu ha’u-nia feen, nia mai, tuur, no husu ha’u saida mak akontese. Ha’u dehan, ‘Rona, ha’u sei ko’alia!’ Ha’u sei la’o fali! Ha’u kura ona! Irmán Maria Troncatti kura ha’u!’ Nia ho ha’u-nia família tomak sai kontente tebes. Ami hotu sente ksolok boot, tanba ha’u-nia família tomak terus maka’as ba ha’u, husi momentu ne’ebe ha’u iha koma durante fulan tolu labele ko’alia ka la’o. Liutiha fulan tolu ne’e, Irmán Maria Troncatti mosu: husi loron ne’ebá, ha’u hahú la’o no ko’alia. Hahú husi ne’ebá, ha’u haksolok no agradese tebes ba Irmán Maria Troncatti.
Ami hatene katak ita-boot nia kura mak fíziku, maibé mós espirituál. Ita-boot bele konta buat ruma mai ami kona-ba mudansa ida-ne’e?
Sim..! Buat ne’ebé ita-boot dehan ne’e loos: fízikamente, ha’u seidauk kura kompletamente, maibé ha’u kontente tanba ha’u bele la’o no ko’alia ho ha’u-nia belun sira no ha’u-nia oan sira. Buat sira-ne’e hotu halo ha’u haksolok tebes; ha’u-nia moris muda kompletamente.
Uluk, bainhira haʼu sei saudavel, haʼu la fiel ba haʼu-nia feen. Uumanamente, dalaruma iha tentasaun sira. Atu hateten loloos, ha’u la’ós ema di’ak ida; sempre iha obstákulu iha moris, maibé ha’u luta nafatin. Nune’e mak ha’u moris. Maibé dezde haʼu-nia asidente, haʼu-nia moris troka ona, liuliu haʼu-nia relasaun ho haʼu-nia oan sira no ha’u-nia família tomak kontente, no ha’u hakarak mate ho kontente tebes.
Ita hatene grasa ka milagre seluk ne’ebé ema ruma simu liuhusi irmán Maria Troncatti nia intersesaun?
Ita hatene katak, sim, Irmán Maria moris iha povu Shuar nia leet. Nia halo milagre rua iha ha’u nia família. Ida, ba ha’u nia maun no ida seluk ba ha’u-nia kuñadu. Entre povu Shuar, Irmán Maria Troncatti moris duni.
Mensajen saida mak ita-boot sei fó ba sira hotu ne’ebé invoka Irmán Maria Troncatti?
Ha’u hakarak dehan ba ema hotu ne’ebé rona ha’u-nia mensajen katak, maske iha moris iha obstakulu, ita tenke luta nafatin atu la’o ba oin. La ho Maromak, ita laiha buat ida, maibé ho Maromak, buat hotu posibel iha moris bele. Ida-ne’e mak ha’u hakarak hatete ba ema hotu: Se imi moras, iha fiar iha Nia no iha Maromak Kbiit-Na’in. Ho Nia, la kuran buat ida… imi bele hein ba mate de’it, maibé ho Maromak, laiha buat ida-ne’ebé imposivel iha moris… buat hotu bele. Obrigado barak.
TATOLI
