KOVALIMA, 17 Outubru 2025 ( TATOLI)- Administradór Postu Administrativu Tilomar, Venancio Sarmento kestiona kualidade atendimentu pesoál saúde ba pasiénte sira iha fim de semana.
Autoridade postu administrativu Tilomar hato’o lamentasaun-ne’e relasiona kualidade atendimentu pesoál saúde sira iha sentru saúde Tilomar pesoál saúde sira haksesuk malu ho família pasiénte sira.
“Komunidade sira hato’o lamentasaun bainhira halo konsulta iha iha fim de semana hanesan loron sábadu no domingu ba pasiénte ne’ebé moras ho emerjénsia hodi hasoru enfermeira sira balun nia komunikasaun ladun diak tanba trata fali ita-nia pasiente-sira”, Administradór Postu Administrativu Tilomar, Venancio Sarmento, hato’o, iha salaun AMC ohin.
Autoridade postu ne’e hato’o ba Diretór Servisu Saúde munisípiu Kovalima atu haree nune’e bainhira halo atendimentu ba pasiénte sira tenke ho kualidade.
“ Ha’u hato’o ba Diretór servisu saúde atu bele haree realidade bainhira pasiente-sira moras ho emejénsia husu tulun ba enfermeiru sira maibé enfermeiru sira istóriu malu ho família pasiente sira”, nia informa.
Hataan ba kestaun ne’e, Diretór Servisu Munisípiu Saúde Kovalima, Domingos Sequeira , esplika katak, iha fim de semana bainhira iha sentru saúde sira laiha pesoál saúde laiha atu halo atendimentu bele pasa informasaun, nune’e bele buka solusaun.
“Administradór postu administrativu sira bainhira iha fim de semana laiha pesoál saúde atu halo atendimentu kontaktu ha’u maibé durante ne’e ha’u la simu lamentasaun ruma husi ita-boot no asina mós sira-nia relatóriu”, nia esplika.
Dirijente dehan katak pesoál saúde balun hela dook husi sentru saúde, maibé pesoál ne’ebé maka ho rejime jerál halo atendimentu durante oras 24 la haree ba oras maibé ba sira ne’ebé maka rejime espesiál servisu durante oras ualu de’it.
Tuir dadus funsionáriu ne’ebé servisu iha autoridade munisipál saúde Kovalima hamutuk 350 kompostu husi permanente 173, kontratadu na’in 177 koloka ba sentru saúde Komunitáriu Tilomar 41.
Jornalista:Celestina Teles
Editór:Florencio Miransa Ximenes
